Хятад, Монгол хоёр орны хэвлэл мэдээллийн IX чуулган болов

ХОУР-гийн мэдээ: Энэ сарын 7-9-нд, Монгол  улсын Өмнөговь аймгийн төв Даланзадгад хотод Хятад, Монгол хоёр орны хэвлэл  мэдээллийн салбарын IX чуулган болж өнгөрлөө. Чуулганыг Хятадын Төрийн зөвлөлийн  Хэвлэл мэдээллийн алба, Хятадын Хэвлэл мэдээллийн ажилтнуудын нийгэмлэг,  Монголын сэтгүүлчдийн нэгдсэн эвлэл, ӨМӨЗО-ны хэвлэл мэдээллийн албанаас хамтран  зохион байгуулж, Хятадын Төрийн зөвлөлийн Хэвлэл мэдээллийн албаны Гадаад  харилцааны газрын орлогч дарга Лин Ли, Хятадын Хэвлэл мэдээллийн ажилтнуудын  нийгэмлэгийн Нарийн бичгийн дарга нарын газрын тэргүүн Ван Дүнмэй, ХКН-ын  ӨМӨЗО-ны хорооны Суртал ухуулгын газрын байнгын дэд дарга, Хятадын Хэвлэл  мэдээллийн ажилтнуудын нийгэмлэгийн дарга Жөү Чүньже, Монгол улсын их хурал,  засгийн газрын гишүүн, ГХЯ-ны сайд Д.Цогтбаатар, Монгол улсын ерөнхийлөгчийн  албаны хэвлэл мэдээллийн газрын дарга Ж.Цэсэн, Өмнөговь аймгийн засаг дарга  Н.Наранбаатар зэрэг холбогдох салбарын удирдлага, хэвлэл мэдээллийн салбарын  төлөөлөгчид нийт 200 гаруй хүн оролцлоо.  

 Чуулганыг Монголын сэтгүүлчдийн нэгдсэн  эвлэлийн ерөнхийлөгч Х.Мандахбаяр даргалж, Монгол улсын их хурал, засгийн газрын  гишүүн, ГХЯ-ны сайд Д.Цогтбаатар хурлыг нээж үг хэлжээ. Тэрээр: Монгол улсын  засгийн газар Хятад, Монгол хоёр орны хэвлэл мэдээллийн салбарын энэ чуулганыг  дээд хэмжээнд үнэлж байна. Хоёр орны салбар хоорондын ажлын харилцаа холбоо,  найрсаг хамтын ажиллагаагаар дамжуулж, харилцан ойлголцлоо нэмэгдүүлж,  найрамдлаа гүнзгийрүүлэн, хамтын ажиллагаагаа өргөтгөхөд ард иргэдийн харилцааны  бат бэх суурь тавихыг хүсэж байна гэжээ.   

Хятадын Төрийн зөвлөлийн Хэвлэл мэдээллийн  албаны Гадаад харилцааны газрын орлогч дарга Лин Ли: Хятад, Монгол бол хаяа  нийлэн оршдог сайн хөрш, сайн найз, сайн түнш юм. 2014 онд Ши Жиньпин дарга  Монгол улсад түүхэн ач холбогдолтой айлчлал хийж, хоёр орны харилцааг иж бүрэн  стратегийн түншийн харилцаа болгон хөгжүүлсэн юм. Үүгээр гараа болгон, Хятад,  Монгол хоёр орны харилцаа, олон салбарын ажил хэрэгч хамтын ажиллагаа  гүнзгийрэн, баялаг амжилттай хөгжиж, хоёр ард түмэнд бодит үр шимээ өгч байна  гэжээ.  

 Хятадын Хэвлэл мэдээллийн ажилтнуудын  нийгэмлэгийн Нарийн бичгийн дарга нарын газрын тэргүүн Ван Дүнмэй чуулганд  илтгэл тавьж, чуулганы ач холбогдлыг үнэлэн, Хятадын Хэвлэл мэдээллийн  ажилтнуудын нийгэмлэг, Монголын сэтгүүлчдийн нэгдсэн эвлэлтэй хамт “Нэг бүс нэг  зам”-ын бүтээн байгуулалтын хүрээнд ард иргэдийн харилцаа холбоог нягтруулан,  нийгэм, олон нийтийн харилцааны суурийг бэхжүүлж, хоёр орны харилцааны хөгжилд  хувь нэмрээ оруулахад бэлэн байгаагаа илэрхийлжээ.

 Сэтгүүлч О.Дарамбазар  мэдээлэв