Торгоны замын уламжлалт соёлын олон улсын эрдэм шинжилгээний оны анхдугаар хурал болж байна
Хятадын Нийгмийн ШУА-ийн Торгоны замын соёл судалгааны төвийг байгуулах бэлтгэл хурал, Торгоны замын уламжлалт соёлын олон улсын эрдэм шинжилгээний оны анхдугаар хурал 11-р сарын 15-нд Бээжин хотод нээгдлээ.
Хятадын Нийгмийн ШУА-ийн Үндэстний утга зохиол судлах хүрээлэнгийн судлаач, Монгол утга зохиол судлах төвийн дарга Ц.Цэцэнбат шинээр байгуулж буй судалгааны төвөө танилцуулахдаа:
Торгоны замын соёл судлалын төвийг Хятадын Нийгмийн ШУА, Унгарын ШУА-ийн Угсаатны зүй судлалын хүрээлэнтэй хамтран байгуулж байгаа юм. Энэ төвийг байгуулснаар Торгоны замын уламжлалт соёлын олон улсын эрдэм шинжилгээний оны хурлыг тогтмол зохион байгуулах, “Торгоны замын соёл судлал” сэтгүүлийг жилд нэг удаа хэвлэх, Торгоны зам дагуу улс орнуудад хээрийн шинжилгээ зохион байгуулах зэрэг ажлыг хийнэ гэжээ.
Хятадын Ардын их сургуулийн Сонгодог судлалын дээд сургуулийн дэд захирал, профессор Оюунбилэг: Торгоны замын бүс нутгийн соёл судалгааны төвийг байгуулж буй нь чухал ач холбогдолтой юм. Монгол судлалд бүр ч илүү нөлөөтэй. XIII зуунаас хойш Монголчууд Баруун Европ, Ази Европын төв нутгийн соёлд гүн гүнзгийн нөлөө үзүүлсэн. Тийм учраас Торгоны зам дагуу орнуудын монголч эрдэмтэдтэй илүү нягт холбогдон, эрдэм шинжилгээний солилцоо хийж, Монголтой холбоотой соёлын элементийг илрүүлж судлахад ихээхэн түлхэц болно гэжээ.
БНСУ-ын Сөүлийн их сургуулийн Хүмүүнлэгийн судалгааны хүрээлэнгийн ахлах судлаач Ли Сао Нань: Нүүдэлчдийн соёл хил хязгааргүй, чөлөөтэй байдаг. Тэдний соёлын уламжлалыг өнөө үед дахин анхаарах хэрэгтэй. Яагаад гэвэл одоо хил хязгааргүй, даяаршлын эрин үе ирж байна. Нүүдэлчдийн соёлын уугуул мөн чанарыг сайн судалж байж бид өнөөгийн соёл иргэншил, түүний цаашдын хөгжлийг илүү сайн ойлгож чадна гэжээ.
Гурав хоног үргэлжлэх тус хуралд Хятад, Монгол, Орос, Герман, Польш, Унгар, Япон зэрэг 10 орны 100 гаруй судлаачид Торгоны замын соёлын судалгаа, “Жангар” буюу Баатарлаг туульсын судалгаа, Баатарлаг туульсын тухай Б.Бүрэнбэхийн судалгаа зэрэг сэдвээр ярилцах юм.
ХОУР-гийн сэтгүүлч Болор, Дүүрэнжаргал нар мэдээлэв