Өвөр Монголын анхны хурдны төмөр зам ашиглалтад оров

8 дугаар сарын 3-нд D6980  дугаарт Өвөр Монголын анхны хурдны галт тэрэг цагт 250 км хурдаар Хөх хотын Зүүн вокзалаас Улаанцав хотыг зорилоо.

Хөххот-Улаанцав чиглэлийн хурдны төмөр замын нийт урт 126 км бөгөөд Хөх хотын галт тэрэгний Зүүн вокзалаас Улаанцав хот хүрэхэд ердөө 40 минут зарцуулах юм.

Хөх хот-Улаанцав чиглэлийн хурдны төмөр зам бол одоо байгуулж буй Хөх хот-Жанчхүү чиглэлийн хурдны төмөр замын нэгэн хэсэг юм. Тус төмөр замыг 2014 оноос эхлэн байгуулж, 4 жилийн хугацаа зарцуулан байгуулж дуусахаар төлөвлөж байгаа бөгөөд Хятадын дунд, урт хугацааны төмөр замын бүтээн байгуулалтын төлөвлөгөөний "8 хөндлөн, 8 гулд" хурдны төмөр замын чухал бүрэлдэхүүн хэсэг юм. Хөх хот-Жанчхүү чиглэлийн хурдны төмөр замыг байгуулж дууссаны дараа Бээжин-Жанчхүү чиглэлийн төмөр замтай холбосноор Хөх хотоос Бээжин ороход ердөө 3 цаг аялах болно.