Шинэ оддын шинэ бүтээл мэндэлж байна

Дуу хөгжмийн шинэ оддыг төрүүлэх зорилготой, Өвөр Монголын алдарт“Жалам хар” хамтлагийн нэрэмжит гурав дахь удаагийн “Жалам хар-Шинэ одод” уралдааны анхан шатны шалгаруулалт 2017 оны 11-р сарын 18-19-нд ӨМӨЗО-ны Алшаа, Хянган, Шилийнгол аймаг, Хөлөнбуйр, Тунляо, Улаанхад, Улаанцав, Баяннуур, Ордос хотод зэрэг явагдаж, улмаар 12-р сарын 2-нд Хөх хотод хоёрдугаар шатны уралдааныг хийсний үр дүнд 9 аймаг, хот тус бүрээс нэг нэг залуу авьяастныг шалгаруулсан билээ.

Улмаар залуу авьяастнуудыг гурав гурваар нь баг болгон мэргэжлийн уран бүтээлчдэд даалган өгч шинэ уран бүтээл хийж өгч байна. Тухайлбал залуу авьяастан Эелсэг, Бадамханд, Бөхбат нарыг уран бүтээлч Оргил дааж авч, Хасгэрэл, Жанлян, Наргил нарыг уран бүтээлч Өргөн удирдаж, Гэрэлт, Оргил, Сэцэнгуа нарыг уран бүтээлч Хөгжилт бэлтгэн, тэдний тус тусын шинэ уран бүтээлийг мэргэжлийн студид бичүүлж байгаа бөгөөд мөдхөн үзэгч, сонсогч та бүхний сонорыг шинэ оддын шинэ уран бүтээлээр мялаах гэж байна.