ХОУР-гийн монгол хэлний нэвтрүүлгийн газрын шинэ боловсон хүчин, залуу сэтгүүлч Хүчит өөрийн нутаг буюу Өвөр Монголын Хэшигтэн хошууны галын тахилгын тухай ингэж хуучилсан юм: хөхөө сар буюу Хятадын билгийн улиралын 12-р сарын 22-ны өдөр гэр орноо цэвэрлэж, 23-ны өдөр галаа тахидаг. 23-ны өдөр эхлээд махаа чанаж, дараа нь олон төрлийн амтатан чихэр жимс чавга хийсэн тостой будаа чанана. Нар жаргаж бүрий болоод од барилдахаар, чанаж болгоод сийлсэн өвчүүгээ амьд хонины ноосоор ээрсэн утасаар ориож, тулган дотроо ариун чөвдөл жийрэглээд түүнийхээ дээр нөгөө бэлэн болгосон өвчүүгээ дээш нь харуулан тавьж, түүний дотор цагаа идээ, шар тос, цус чутгаагүй хос тэргүүтэй олон зүйлийн улаан цагаан амтат идгээний дээжийг тавьж, дээр нь бас цагаан шар улаан ногоон хөх таван өнгийн торгоор хийсэн өлзий зангиа тавьна. Бүх зүйлийг бүрдүүлсний дараа гадуур нь сэмжин өөхөөр бүрнэ. Бас тулганы 4 очиг дээр гурилаар тахил хийж, зарим айл нь түүний дотор шар тос, зарим айл нь архи хийдэг. За ингэж бүх зүйл бэлэн болсны дараа тэнгэр бурханд өргөлт өргөж, хүж зулаа асаагаад нөгөө бэлэн болгосон зүйлүүдийг асааж, галаа тахиж мөргөдөг. Дараа нь галын бурхныг тэнгэрт мордуулж, цаасан пуужин дугаргана.

      Галын бурхан нь өнгөрөн одож байгаа жилийнх нь битүүний өдөр тухайн айл өрхөд буцан заларч, тэдний бүх гэрийн амар амгалан байдлыг хамгаалан саатдаг бөгөөд дараа жилийнх нь мөн хөдөө сарын 23-ны өдөр тэнгэрт гарч, хурмаст тэнгэрт тухайн айл өрхийн сайн муу явдал үйлдсэн байдлын талаар айлтган мэдүүлдэг гэж ардын уламжлалт үлгэр домогт өгүүлдэг юм. Гал тахиснаас хойш битүүн болтлох 7 хоногт хүний ертөгцөд бурхангүй болохоор хурц иртэй мэс зэвсэг хөдлөгөхгүй, хэл ам гаргахгүй, хүүхэд шувууг загнаж зодохгүй, муу муухай үг хэлэхгүй, нэн ч галыг догшин ширүүн шилээбэрдэж болохгүй аж. Зарим айл нь бас 24-нд галаа тахидаг. Хэшигтэн бол Чингэс хааны цэрэг байсан учраас зарим нь цэрэг дайны учраар яваад буцаж ирж амжсангүйгээс 24-нд тахидаг болсон гэнэ. Галаа тахиж дууссаны дараа бас хонь малаа сэтэрлэнэ. Хониор жишээлэхэд, зулайд нь шар тос түрхэж, аманд нь мөн тос амсуулаад хүзүүнд нь сэтэр зүүлгэж, онголно гэжээ.