Хятадын Гадаад харилцааны сайдын туслах Ли Хүй 12-ны өдөр Бээжинд хийлгэсэн хэвлэлийн бага хурал дээр хэлэхдээ, энэ сарын 15-д Хятадын Шанхай хотноо болох ШХАБ-ын гишүүн орны тэргүүн нарын зөвлөлийн 6-р хурлыг Хятадын тал дээд зэргээр чухалд үзэж, дээд хэмжээний уулзалттай холбогдох олон талын бэлтгэл ажлаа дуусгалаа гэж мэдэгджээ.

    Тэрээр танилцуулж хэлэхдээ, энэ дээд хэмжээний уулзалтаар ШХАБ-ын хөгжлийн амжилт болон туршлагыг нэгтгэн дүгнэж, уг байгууллагын хөгжлийн цаашидын хандлага болон хэрэгжүүлэх ажил үйлсийг хэлэлцэн тогтоох болно. Дээд хэмжээний уулзалтын хугацаанд ШХАБ-ын гишүүн орнуудын тэргүүн нар хуралдаж, уг байгууллагын хөгжил болон харилцан сонирхож байгаа олон улс, бүс нутгийн гол гол асуудлаар санал бодлоо өргөнөөр солилцож, нэг тунхагт гарын үсэг зурж, нийтлэх болно. Энэ нь уг уулзалтын бүхэлд нь дүгнэсэн улс төрийн баримт бичиг болох юм гэжээ.

    Ли Хүй цааш нь хэлэхдээ, Хятад улсын дарга Хү жиньтао болон ШХАБ-ын гишүүн орнуудын тэргүүн нар дээд уулзалтад оролцоно. Дарга Хү Жиньтао дарга орны тэргүүний хувиар хурлыг даргалан дэлгэрэнгүй үг хэлж, Хятадын талын ШХАБ-ын талаархи бодлогыг тал бүрээр тодорхойлж, уг байгууллагын хөгжилд тус дөхөм үзүүлэх санал санаачилга дэвшүүлэх болно гэжээ. \Урьхан орчуулж, Буян хянав\