Хятадын Хэ Бэй мужийн төв Ши Жяжуан хот бол орчин үеийн төмөр зам нэвтрэн хөгжихийн дагуу шинээр бий болсон хот юм. Сүүлийн жилд энэ хотын хөгжил улам олон гадаадын найз нөхдийн сонирхлыг татаж, энд ирж ажиллаж сурах, айл гэрээрээ амьдрах хүн олон болсон байна. Сонсогчид та бүхэн энд хичээл сургалтын ажил хийж байгаа хэдэн гадаадын найз нартай танилцацгаана уу.

     28-тай Канад хүн Майке Ливинстон Ши Жяжуанд ирээд хоёр жил болж байна. Тэрээр өнөө Хэ Бэйн Мэдээллийн аж үйлдвэрийн дээд сургуульд багшилж байна. Намайг ирснээс хойших энэ хоёр жилийн турш, Ши Жяжуанд асар их өөрчлөлт гарсан гэж тэр үзэж байна.

     Тэрээр хэлэхдээ, өөрөө 2004 онд ирсэн. Ши Жяжуан өдрөөс өдөр зүлэгжин ногоорч, гудамж нь өргөжин, том том худалдааны төв байгуулагдсан, байгуулагдаж байна. Энэ хотын хөгжил маш түргэн, орчин үеийн хөгжилтэй том хот болон хөгжиж байгаа сэтгэгдэл төрүүллээ гэжээ.

     Ши Жяжуан бол Хэ Бэй мужийн төв өмнөд хэсэгт байрлаж, Хятадын төмөр зам, авто замын чухал уулзвар газрын нэг тул газар зүйн маш чухал байрлалтай юм. Түргэн хөгжиж байгаа Ши Жяжуан олон хүний анхаарлыг татаж байна. Хятадын олон том хотоор хүрч байсан Майке Ши Жяжуанд хорогдон тогтлоо. Үүнд онцгой учир шалтгаан байдаг юм бол уу?

     Тэрээр хэлэхдээ, өмнө нь би Бээжин, Шанхай, Ши Ань Гуан Жөү, Шэнь Зэнь зэрэг олон хотоор хүрч байсан, хот болгон өөр өөрийн онцлоготой, Ши Жяжуан нь Бээжин, Ши Антай адил өнө удааны түүхтэй биш, гэхдээ тэр нь тосгон байснаасаа хөгжсөн шинэхэн хот, үүнээс бид Хятадын хөгжиж байгаа үйл явцыг ойлгож болох юм гэжээ.

     Чад улсаас ирсэн Оссо бол эдийн засгийн ухааны магистр юм. Ши Жяжуагийн их сургуульд багшлаад гурван жил болж байна. Тэд гэрийн дөрвөн амь бүлээр энд амьдарч, тав тухтай амьдрал, ажлын сайхан нөхцөл, халуун дулаан сэтгэлтэй хүн ардаас болж тэр Ши Жяжуанд маш хайртай болсон байна.

     Энд ирж ажиллахыг сонгосон маань эндэхийн уур амьсгал зүгээр, хүн ард нь зочламтай тусархаг, Бээжин шиг том биш боловч бага хот нь түүнийхээ давуутай, ажил хэрэг зохицуулахад дөхөм дөт байдаг . Ши Жяжуанд анх ирээд галт тэрэгний буудалд тохиолдсон явдал надад мартагдашгүй гүн сэтгэгдэл төрүүлсэн. Ши Жяжуанд анх хүрч ирээд галт тэрэгний буудлаас Такси барих гэсэн чинь ер олдохгүй, одоо бодвол Таксины зогсох газар биш байсан байхаа, нэг цагдаа надад туслан унаа олж өглөө, тухайн үед би түүнээс тусламж хүссэнгүй шүү, тэр надад сайн дураас тусалсан, эндэхийн хүн ард хүнд ийм тусархаг байдаг гэж тэр хэлж байлаа.

     Ши Жяжуанд амьдраад хоёр гурван жил болж байгаа Майке, Оссо нараас өөр удаан жилээр амьдарч байгаа гадаадын хүмүүс ч олон бий. Тэд энд өөрийн ажил үйлстэй, гэр бүл найз нөхөдтөй, орчин ахуй, амьдралд бүрөмсөн зохицон дассан байна. Тэд нарын хувьд Ши Жяжуан бол "хоёрдохь төрөлх нутаг" нь болжээ. Ши Жяжуагийн гадаад хэлний их сургуульд багшаар ажиллаж байгаа Англи хүн хатагтай Вилма Сулливан энд ажиллаж амьдраад 11 жил болж байна. Тэр бол Ши Жяжуангийн хөгжлийн гэрчлэгч мөн.

     Тэрээр хэлэхдээ, намайг анх энд ирэхэд одоогийнх шиг цэцэрлэгт хүрээлэн, гольфын талбай байгаагүй, харин бүр тарианы газар байсан, өөрөө энд 11 жил амьдарч байна, Ши Жяжуангийн хөгжлийг нүдээрээ харж ирсэн гэжээ.

     Энэ жилийн 9-р сард Вилма Сулливан Хятад улсад ажиллаж байгаа гадаадын мэргэжилтнүүдэд олгодог 2006 оны "найрамдал шагнал" хүртсэн байна. Энэ бол Хятад улс жил болгон Хятадад ажиллаж байгаа 300 мянган гадаадын мэргэжилтнүүдийн дундаас шалгаруулдаг төрийн шагнал юм. Вилма Сулливан бол Хэ Бэй мужаас уг шагналыг хүртэж байгаа анхны мэргэжилтэн юм. /Урангоо орчуулж бэлтгэв/