Шинжаны Алтайн районыг хүн төрөлхтөний цасны гулгалт үүссэн газар мөн гэж Шанхайн дэлхийн гиннесийн төв албан ёсоор хүлээн зөвшөөрөв. Шанхайн дэлхийн гиннесийн төвийн туслагч Ние Жинчуань хэлэхдээ, судалгаа шинжилгээнд үндэслэбэл, 8000 жилийн өмнө Шинжаны Алтайд эртний хүмүүс цасаар гулгаж байжээ, одоо ч гэсэн тухайн орон нутгийн уугуул иргэд "үсэн цана" болон "ганц модон цанын таяг"-аар гулгах уламжлалаа хадгалсаар байна. Ингээд "Шинжаны Алтай-хамгийн эртний цасны гулгалт үүссэн газар" гэсэн гиннесийн үнэмлэх олгосон юм байна. Судлаачид Алтайн районы Хандгайт монгол үндэстний сяны Дунд булаг хадны зургаас хүн цасаар гулгаж байгаа дүрсийг илрүүлжээ. Энэ нь одоогоос 12 мянган жилийн өмнөх явдал юм. Энэ нь өнөө дэлхий дээрх хамгийн эртнийхээр тооцогддог Оросын Уралын нурууны хүлрийн намгаас олдсон цанын хэлтэрхийгээс бас 4000 жилийн өмнөх байна. Хятадын Шинжаны Алтай бол хүн төрөлхтөний цасны гулгалт үүссэн газар мөн гэж 2006 оны сүүлчээр Шинжаны Уйгарын өөртөө засах районы музей, Баруун хойдын их сургууль зэрэг байгууллага Бээжинд мэдэгдсэн байна.

     Та бүхэндээ дуулгах бас нэг сонин мэдээ гэвэл, Монгол Улсын их сургуулийн хэл соёлын дээд сургуулийн оюутнууд болон Өвөр монголын их сургуулийн Монгол судлалын дээд сургуулийн оюутнууд солилцоо хийсэн байна. 2006 оны сүүлчээр Монгол Улсын их сургуулийн профессор Даваадорж сургуулийнхаа хэл соёлын дээд сургуулийн 10 оюутнаа дагуулж, 3 долоо хоногийн хугацаатайгаар Өвөр монголын их сургуулийн Монгол судлалын дээд сургуультай танилцаж, солилцоо хийсэн байна.

     Үүнээс өмнө, Өвөр монголын их сургууль болон Монгол Улсын их сургуулийн хамтын ажиллагаа солилцооны гэрээний дагуу Өвөр монголын их сургуулийн Монгол судлалын дээд сургуулийн нэвтрүүлэгч хөтлөгчийн салбарын оюутнууд тус сургуулийн профессор Учралтын удирдлаган дор Монгол Улсын их сургуульд очиж, 3 долоо хоногийн хугацаатай дадлага хийсэн юм.

     Сонсогчиддоо дуулгах бас нэг баярлууштай мэдээ бол сүүлийн үед "Жянгар" веб сайт шинээр мэндэлсэн явдал болно. тус веб сайтын хаяг бол http//www.djangar.cn/ болно. Та тус веб сайтаас монгол хятад хоёр хэлээр бичигдсэн "Жангар"-ын тухай мэдээ болон "Жангар" судлаачдын холбогдох материалыг олж унших болно. Тус веб сайтыг 2006 оны сүүлчээр Шинжаны Ховог сайр монгол өөртөө засах сянийн засгийн газар болон Хятадын "Жангар" судлах нийгэмлэг хамтран хийсэн байна. "Жангар" веб сайт нь "Жангар"-ын тухай мэдээ, "Жангар", гадаад дах "Жангар" судлал, Хятад дах "Жангар" судлал, тусгай судлал, ном өгүүлэл, материалын хөмрөг, Жангарын тухай зургууд зэргээс бүрджээ.