2008 оны Бээжингийн олимпийн наадмын хугацаанд Бээжин хотынхон олон орны тамирчин, уралдаан тэмцээний ажил хариуцсан албаны хүмүүс, олимпийн наадам сонирхон үзэгч 600 мянга гаруй хүнийг хүлээж авах юм байна. Ингээд Бээжин хотын аялал жуулчлалын ажил хариуцсан салбар Олимпийн наадмын үеэр жуулчдыг хүлээж авах бэлтгэл ажлаа эрчимтэй хийж байна .

     Бээжин хотынхон олимпийн наадмыг зохион явуулах эрхийг авахдаа хийсэн амлалтынхаа дагуу олимпийн наадмын үеэр одон зэрэглэлийн 800 зочид буудал бэлтгэх хэрэгтэй юм. Өнөө Бээжинд одон зэрэглэлийн 700 зочид буудал байгаа аж. Бээжин хотын аялал жуулчлалын ажил хариуцсан газрын орлогч дарга хатагтай Шюн Юй мэй манай радиогийн сурвалжлагчид ярилцлага өгөх үедээ, Бээжинд шинэ зочид буудал байгуулахгүй, өнөөгийн байгаа зочид буудлуудыг засан сайжруулж, одон зэрэглэлийн болгоно гэжээ. Тэрээр танилцуулж хэлэхдээ, Бээжин хотынхон 4000 гаруй зочид буудлыг засан сайжруулах явцдаа нэлээд сайныг нь одон зэрэглэлийн болгоно. Амласан ёсоороо олимпийн наадамд зориулж, энэ оны эцсээр одон зэрэглэлийн 800 зочид буудлыг бүр бэлэн болгоно гэжээ.

     Тэрээр хэлэхдээ, байдлыг үзэхэд олимпийн наадмын үеэр Бээжинд ирж наадам сонирхогчид болон жуулчид ихээр нэмэгдэх боловч зочид буудлын хувьд боломжийн хангалттай байна, харин үйлчилгээний түвшинг дээшлүүлэх шаардлагатай. Ялангуяа энгийн зочид буудлуудын үйлчилгээг сайжруулах нь манай энэ жилийн ажлын нэг чухал тал болох юм гэжээ.

     Зочид хүлээн авах хүчин чадлаа өргөтгөхийн зэрэгцээ зочид буудлуудын хүрээлэн байгаа орчныг сайжруулах ажлыг чухалд үзэж, Бээжин хотын аялал жуулчлалын ажил хариуцсан газар олимпийн наадмыг зохион байгуулах комисстой гэрээ хийн олимпийн наадмын үйлчилгээнд хамрагдсан 122 зочид буудалд бохирдолгүйн шалгуур хэрэгжүүлэхээр болж хяналт шалгалтын ажил ч албан ёсоор эхэлсэн байна.

     Бохирдолгүй зочид буудал гэж зочдод аюулгүй, эрүүл саруул, хүрээлэн байгаа орчныг хамгаалах шаардлага хангасан өрөө байр, хоол ундаар хангахын зэрэгцээ хүрээлэн байгаа орчныг хамгаалах болон эх баялагийг зүй зохистой ашиглах зочид буудлыг хэлж байгаа юм. Бохирдолгүй зочид буудлын стандартын дагуу зочид буудлуудыг өргөтгөж, сайжруулж, засан шинэчилж, тоног төхөөрөмжийг нь шинэчлэхдээ цэвэр материал хэрэглэх болно. Хоол хүнсний хувьд бол хорио цээрийн хяналт шалгалтын шаардлага хангасан мах махан бүтээгдэхүүнээр хангаж, хүнсний ногоо, жимс жимсгэнэ зэргийг оруулах зам сувгийг хатуу тогтоон, хүнсний аюулгүй байдлыг баталгаажуулна. "Бээжин олон улсын зочид буудал" бол олимпийн наадмын албаны талын зочид буудлын нэг юм. Уг буудлын ерөнхий захирал Чэнь Шюй хуа танилцуулж хэлэхдээ, олон улсын зочид буудал өнөө тоног төхөөрөмжөө засан сайжруулахад 5-6 сая юаний хөрөнгө оруулаад байгаа бөгөөд эрчим хүч хэмнэж, хүрээлэн байгаа орчныг хамгаалах олон арга хэмжээ авч байна гэжээ. Тэрээр хэлэхдээ, өнөө бид хүрээлэн байгаа орчноо хамгаалах үүднээс цагаан хэрэгсэл зэргийг өдөр болгон сольхоо больж, зочидтойгоо ярьж байгаад явахаар нь солихоор тохиролцож, ус хэмнэж, бохирдлыг багасгаж байна гэжээ. Үүнээс гадна, сам, саван зэргийн ганцхан удаа хэрэглээд хаядаг явдлыг багасгаж байна. Цахилгаан, ус зэргийн эрчим хүчийг хэмнэх арга хэмжээнүүд авч, хүрээлэн байгаа орчныг хамгаалж байна гэжээ. \Э.Цогзолмаа орчуулж, Буян хянав\