Хятадын дорнод нутгийн Хан Жөү хотын дүүрэгт Шуан ши гэдэг суурин бий. Энэ сууринд "үхэрчин ах" гэдэг залуу байдаг. сүүлийн жилүүдэд үхэрчин ахын нутгийнхан жуулчлалын ажил төрөл хөгжүүлээд чинээлэг амьдралтай болжээ.

      Шуан ши суурины газар болгонд хулсан мод ногоороод гол горих цэнхэрлэн урсаж, агаар тэнгэр цэлмэг, үзэмж байдал онцын сайхан юм. Энэ үзэсгэлэнт сайхан сууринд амьдардаг үхэрчин ах өдөр бүр эртлэн босч суудлын жижиг цагаан машиндаа суугаад үхэр хариулахаар гарна. Суудлын энэ машиныг жуулчлалын орлогоороо авсан юм.

     Үнэндээ үхэрчин ахын үнэн нэр нь Жян Рүнгэнь, Энгийн тариачин хүү, үхэр сургаж чаддагаас нутгийн хүмүүс түүнийг " үхэрчин ах" гэж нэрлэх болжээ. Үхэр нь Хятадын тариалангийн чухал багаж байсан түүхтэй . Сүүлийн жилүүдэд Хятадын эдийн засаг, шинжлэх ухаан техник түргэн хөгжсөнөөс тариаланд машин механик нэвтэрч, үхэрээр тариалах уламжлалт арга хэлбэр хоцрогдсон . Үхэрчин ах үхэрээ яах билээ гэж санаа зовж суухдаа жижиг сууринд нь аялал жуулчлалаар ирэх хүн өдөр ирэх тутам нэмэгдэхийг хараад энэ сайхан боломжийг ашиглан орлогоо нэмэгдүүлэх хэрэгтэй гэж сэтгэжээ. Суурин нь хөгжлийн энэ хандлагад анхаарлаа хандуулан аялал жуулчлалын компани байгуулж, аялал жуулчлалын арга хэмжээг хариуцан зохион байгуулах болсноор жуулчид нэн олон ирэх болов.

     Шуан Ши суурин нь Шанхай болон Хан Жөү хоёр том хотын ойролцоо байрладаг болохоор газар зүйн давуу нөхцөлтэй. Мөн уг суурины байгалийн үзэмж байдал ч үзэсгэлэнтэй сайхан төдийгүй хэдэн мянган жилийн эртний түүх соёлын ул мөртэй тул жуулчдын сонирхлыг ихэд татах болжээ. Гэхдээ эргэн тойрны тосгон сууринууд бүгд адилавтар байдаг болохоор бусдаас ялгагдах ямар нэгэн давуу талаар жуулчдын сонирхыг татах нь Шуан Ши суурины жуулчлалын компанийн өмнө тавигдсэн асуудал болжээ.

      Тэд иргэдээс санал зөвлөлгөө хүссэнд Үхэрчин ах Шанхайн нэг зочин үхэр тэргэнд суухыг хүсч байсныг санаж бид хотын машин тэргэнд суудаг хүмүүсийг үхэр тэргэнд суулган үзэмжит газруудаар тойруулъя гэсэн санал дэвшүүлжээ. Ингээд компани нь үхэрчин ахыг үхэр тэрэг бариулахаар урив. Үхэрчин ах үүнээс хойш тариан ажил хийхээ больж жуулчдад үхэр тэргээр үйчлэх болсон байна. Нутгийн үхэртэй айлууд ч үхэрчин ахын уриалснаар шинэ ажилтай болж, 2000 онд энэ сууринд хэдэн мянгахан жуулчид ирдэг байсан бол өнөө зургаа долоон зуун мянгад хүрэх болжээ.

      Энэ жилүүдэд, үхэрчин ах мөнгө төгрөгтэй болж, ажилд дөхмийг бодож хоёр суудлын машин авсан байна. Мэдээллийн эхэнд суудлын машинд суугаад үхэр хариулж байна гэсэн нь үүнээс үүдэлтэй юм.

     Сүүлийн хэдэн жилд Шуан Ши суурины аялал жуулчлалын үйлс түргэн хөгжиж, компанийн ажил төрөл ч өргөжин, иргэдийн орлого нэмэгдэн амьдрал нь сайжирч, газар болгонд хөгжил дэвшлээр бялхан хүн бүхэн баяр баясгалантай амьдарч байна. /Урангоо орчуулж бэлтгэв/