МЭӨ 1-р зуунд Хятадад үндэсний 80 гаруй хөгжмийн зэмсэг байжээ. Хөгжлийн урт удаан хугацаанд аажмаар уламжлалт хөгжмийн 5 том төрөл бий болсон. Үүнд: дууны хөгжим, дуут бүжгийн хөгжим, ерөөл магтаалын хөгжим, жүжгийн хөгжим, хөгжмийн зэмсгийн хөгжим багтана. 1978 онд Хэбэй мужийн орчмоос 2400 жилийн өмнөх Байлдаанч улсуудын үеийн 124 төрөл зүйлийн хөгжмийн зэмсэг олдсоны дотор гоёмсог хийцтэй, тус бүрдээ өвөрмөц өнгөөр дуугардаг 65 хонх гарсан нь ихээхэн сонирхол татсан юм. Үүнээс хойш Хятадын хөгжмийн урлаг цэцэглэн хөгжилтийн олон үе шатыг туулсан.

     1919 оны "5дугаар сарын 4"-ний хөдөлгөөний дараа хятадын дуу хөгжимд европ арга барил нэвтэрч өргөн хэрэглэх болсон. 30-40-өөд оноос хөгжмийн зохиолчид амьдралд нилээд ойртсон цоо шинэ, гүн гүнзгий утга бүхий ард түмний бахархал төрүүлэхүйц бүтээл олныг туурвисны дотор Не Эр-ийн ая, Тянь Хан-ий үг "Журамт цэргийн марш" зохиогдсон нь эдүгээ БНХАУ-ын Төрийн дуулал болсон юм. БНХАУ байгуулагдсаны дараа төв болон орон нутагт янз бүрийн соёл урлагийн байгууллагууд, хөгжимт жүжгийн театр, найрал хөгжмийн болон дуу бүжгийн чуулгууд, үндэстнүүдийн чуулгууд байгуулагдав.

     Хятадын томоохон хотуудад байнга зохиогддог найрал хөгжмийн концертын хөтөлбөрт өөрийн орны зохиолчдын бүтээлээс гадна дэлхийн сонгодог зохиолууд, романтик хөгжим, орчин үеийн хөгжмийн бүтээлүүд ямагт байдаг. "Кармен", "Эрвээхэй хатан", "Евгений Онегин" зэрэг гадаадын дууриуд хятадын үзэгчдийн хэдийний танил болсон билээ. Өргөн олон түмний хөгжмийн амьдралыг баяжуулдаг томоохон арга хэмжээ бол Хятадын янз бүрийн нутагт тогтмол зохиогддог "Шанхайн хавар", "Бээжингийн найрал дууны баяр", "Зүүн Хойд Хятадын хөгжмийн 7 хоног", "Харбины зун", "Чунчэний хөгжмийн наадам" зэрэг дуу, хөгжмийн баяр наадмууд болно. Мөн түүнчлэн сайн дурын уран сайхны тоглолтод хүмүүс өргөнөөр оролцдог. Жил бүр Бээжинд "5 дугаар сарын цэцэг", Шанхайд "10 дугаар сарын дууны баяр", Фузяньд "Сурагчдын хөгжмийн наадам" зэрэг дуу, хөгжмийн баярууд зохиогддог. Улс түмнүүдийн соёлын солилцоо өргөжин, Хятадын эдийн засгийн боломж нэмэгдэхийн хирээр тус орны хөгжимчид, жүжигчид гадаадын хөгжмийн уралдаан наадмуудад идэвхтэй оролцон удаа дараа тэргүүн шагналууд хүртэж ирлээ. Хятадын хөгжимчид, хөгжмийн хамтлагууд дэлхийн олон оронд айлчлан тоглож, гадаадын нэртэй дуучид, симфони найрал хөгжмийн хамтлагууд, жишээ нь Берлиний найрал хөгжим, Вена хотын найрал хөгжим, Английн радиогийн найрал хөгжим болон гадаадын нэрт дуучид аялан тоглолтоо хийдэг улсын нэг болжээ.