ӨМИС-н УДС энэ жил байгуулагдсаныхаа 50 жилийн ойтой золгож байгаа билээ. УДС нь 1957 онд монгол үндэстний урлаг соёлыг хөгжүүлэх хүрээнд мэргэжлийн уран бүтээлч, урлаг соёлын ажилтнуудыг бэлтгэх зорилгоор анх байгуулагдсан түүхтэй. Түүнээс хойш хагас зууны турш ӨМӨЗО-ны үндэстний урлагийн мэргэжлийн боловсон хүчнийг бэлтгэх чухал бааз болтлоо хөгжиж ирсэн. Тус сургууль 1983 онд ӨМӨЗО-ны Засгийн газарт хүсэлт тавьж улмаар Төрийн Боловсролын Зөвлөлд уламжлан зөвшөөрүүлснээр ӨМУС-н баазад түшиглэсэн ӨМИС-н УДС болон өөрчлөгджээ. Шинэ зуун гарснаас хойш ӨЗО-ны үндэстний соёлын том орныг байгуулах стратегийн хүрээнд хэрэгжүүлсэн олон том хөтөлбөр, төлөвлөгөөний ачаар хөгжлийнхөө шинэ шатанд гарсан байна.

      Уг сургууль одоогоор урлагийн дизайн, уран зураг, дуу хөгжим, соёл урлагийн менежмент, кино, театрын жүжигчин гэсэн 6 сургалтын тэнхим, 1 харъяа урлагийн коллежтэй. Дуу хөгжим зүй, концертмэйстр, хөгжмийн зохиолчийн анги, нэвтрүүлэгч хөтлөгчийн анги, бүжиг, уран зураг, хүүхэлдэй, урлагийн дизайн, сийлбэр, кино жүжигчин, олон нийтийн ажлын менежер гэсэн 13 үндсэн мэргэжлээр мэргэжилтэн бэлтгэдэг. 2004 оноос соёл урлаг зүй, урлаг зүй, дуу хөгжим, уран зураг гэсэн 4 чиглэлээр эрдмийн зэрэг олгох сургалтын хөтөлбөрүүдтэй болсон байна.

      Одоо тус сургуульд 4000 орчим оюутан төрөл бүрийн мэргэжлээр суралцаж, гадаадын өндөр мэргэжлийн 30 гаруй эрдэмтэн профессорууд хичээл заадаг. Сургуулийн багш нар нь үндэстний дуу хөгжмийн онол, монгол үндэстний хөгжмийн зэмсгийн өөрчлөлт, соёл урлаг зүй зэрэг салбарт асар их амжилт гаргасны зэрэгцээ дотоод гадаадын мэргэжлийн шатны тэмцээн уралдаануудад удаа дараа амжилттай оролцож иржээ.

      50 жилийн түүхэндээ тус сургууль нийт 8600 гаруй урлагийн шилдэг боловсон хүчнийг бэлтгэж иржээ. Энд Дэдмаа, Лхасүрэн, Тэнгэр, Ли Жэнь, Кан Шаохүй, Алтан-Уул, Сарангуа, Насан нарын нэрийг дурдахад л хангалттай болов уу. Хагас зууны түүхэн замналтай ӨМИС-н Урлагийн Дээд Сургуулийнхан үе үеийн төгсөгчид урлаг соёлын ажилтнуудаараа бахархаж байдаг.
-