Гадаадын өндөр нэр хүндтэй найруулагчдын Бээжингийн олимп-д зориулсан богино хэмжээний кино хэлбэрийн 5 бүтээл хятадын болоод гадаад орнуудын телевизүүдээр өнгөрсөн пүрэв гаригаас эхлэн цацагдаж эхэллээ.

      Энэ кинонууд Хятадын төв телевиз, Бээжин телевиз, Италийн үндэсний сувгууд, Франц, Италийн телевизүүдээр гарах юм. Мөн sohu.com хятадын үндэсний портал сайт эдгээр бүтээлийг сайтдаа байрлуулж дэлхийн хүмүүсийн хүртээл болгоно.

     2006 оны 7 дугаар сард Бээжин хот дэлхийд нэр хүнтэй 5 найруулагчийг Олимп-д зориулсан кино бүтээл туурвих төсөлд урьсан. Италийн Гуйсэп Торнаторе, Ираний Мажид Мажиди, Францын Патрис Леконтэ, Их Британы Дэрил Гүүдрич, Хонгконгын Андрею Лау нар 2008 оны 8 дугаар сарын8-наас 24-ний өдрүүдэд болох Олимпд зориулсан бүтээл туурвих саналыг ийнхүү хүлээн авсан билээ.

     Харин одоо бүтээлүүд бэлэн болжээ. Торнадоре-н "Эргэн нэгдэл" кино 30 жилийн дараа эргэн уулзаж буй багш, оюутнуудын түүхийг өгүүлдэг. Найруулагч Торнадоре шинэ кино бүтээх төсөлд уригдсанаар анх удаагаа Хятадад анх удаагаа хөл тавьжээ.

     Ираны нэрт найруулагч Мажид Мажиди-н хувьд хятад орон бас л шинэ ертөнц байсан. Тэрээр өөрийн дуртай хүүхдийн сэдвийг бүтээлдээ тусгажээ. "Өнгүүд нисч байна" бүтээл олимпийн наадмыг сэтгэл догдлон хүлээж байгаа хүүхдүүдийн сэтгэлийг илэрхийлсэн байна.

     Францын найруулагч Леконтэ ч Бээжинд анх удаагаа ирсэн юм. Тэгээд түүний мэдрэмжид "Beijing –A Film Impressionistic" бүтээлийн санаа буужээ. "Бээжин- кино уран зураг" бүтээлд Зуны ордон, Олимпийн ордонууд гээд олон үзэмжит зураглалууд дүрслэгдсэн юм.

     Харин Их Британы найруулагч Гүүдрич-н 5 минутын бүтээл "Итгэл"-д тамирчин хүний хүнд хэцүү хөдөлмөрийн тухай өгүүлдэг.

      Олимпийн сэдэвт кино бүтээлийн төсөлд уригдсан хятад гаралтай цорын ганц найруулагч Хонгконгын Лау "Өнгө, Үнэр, Бээжингийн амт" бүтээлээрээ хятадын хоол, хятад соёлыг хайрлах сэтгэлээ илэрхийлжээ.