Найдах, хүлээх гэдэг ирээдүйдээ итгэх итгэл, өдрөөс өдөрт ихээс ихийг бүтээх хүсэл зориг, өндрөөс өндөрт тэмүүлэх эрч бүлгээ. Гэхдээ найдаад хүлээгээд суух биш хүрэхийн төлөө тэмцэх. Өглөө бүхэн шинэ хүсэлд хөтлөгдөн гарах. Бид өмнөх нэвтрүүлгээрээ ӨНДРӨӨС ӨНДӨРТ тэмүүлэхийн үлгэр болгож Бээжинд удахгүй ашиглалтад орох Хятадын Төв телевизийн барилга 230 гаран метр өндөртэй тухай өгүүлж байсан.

      Энэ бол Хятадын хамгийн өндөр байгууламж хараахан бишээ. Одоохондоо Хятадын хамгийн өндөр нь, Шанхай хотын Пудүн дүүрэгт байрлах Жинь мао цогцолбор юм. 88 давхар 420,5 метр, Азидаа хоёрт ордог хэмээгдэх тэрбээр дэлхийн хамгийн өндөр 10 барилгын жагсаалтын нилээд дээгүүр тодруулбал 3-т бичигддэг юм билээ. Хятадын өөрчлөлт шинэчлэлтийн билэгдэл болон сүндэрлэх түүнийг үзэж сонирхохоор гадаадын сая сая жуулчид жилийн жилд энд ирцгээдэг ажээ. 1998 оны 8-р сард ашиглалтад оруулахдаа 420,5 сая доллараар босгосон гэдгийгээ дурьдаж байсан дуулдана. Та сая ОДООХОНДОО гэж хэлэхийг минь анзаарав уу? Зориуд энэ үгийг хэрэглэсэн юм. Яагаад гэвэл үүнээс өндөр байгууламж байнаа. 1997 оноос эхэлж баригдсан энэ хулгана жилийн хавар барьж дуусгах нэгэн нүсэр барилгын дээврийн хамгийн өндөр хэсэг нь газраас 492 метрт гэнэ. Та төсөөлөөд боддоо. Дээшээ хараад бараг 500 метр гэхээр хир өндөрт тусахыг. Бараг л хагас километр гэхээр урт ямар байдаг билээ. Тийм л өндөр дөө. Бичиж суугаа би ч гэсэн худлаа байх вий хэмээмээр. Зарим нэгэн хүмүүст бол арай үгүй байлгүй гэмээр. Гэхдээ л яахын аргагүй тийм өндөр ажээ. Орчлон ертөнц хязгааргүй хийх ажил их байна хэмээсэн нэгэн бизнесмений үг санаанд буух юм. Нэрээ л тийм дээ. Орчлон ертөнц, хүний тэмүүлэл хоёрт хязгааргүй бүлгээ. Энэхүү банк, санхүүгийн төв нь хятадын газрыг дүрслэдэг дөрвөлжин призм хэлбэртэй бөгөөд "Газар тэнгэрийг холбох" тийм өндөр, сүрлэг барилга ажээ. Газар тэнгэрийг холбогч 100 давхар, 377,3 метр квадрат талбайтай, 31 цахилгаан шаттайгаас гадна газар доороо гэхэд л 3 давхар байгууламжтай гэнэ. Нийт 300 өрөө, танхимтай энэхүү барилгын 447 метрийн өндөрт орчныг харах талбайтай байх ажээ. 450 - аад метр өндрөөс дэлхийд танигдсан хотыг дээрээс нь хараад зогсож байх ямрав? дээ. /ямар вэ? дээ/ "Би бууж үдлэм холоос айл нь харагддаг, бугуйл хаям ойроос нар нь манддаг" талын хүн болохоор төсөөлөхгүй байна. Доор хөврөх машин тэрэг, холхих хүмүүс, хотын дуу шуу, харагдаачуу? сонсогдоочуу? Мэдэх юм алга. Шанхай, хэзээнээсээ дэлхийд алдартай хот. Одоогоороо л тус хотод 2010 оны 5-р сарын 1-ээс 10-р сарын 31-нд болох дэлхийн ЭКСПО үзэсгэлэн яармагт 192 орон, олон улсын байгууллага оролцоно гэж мэдэгдсэн дуулдана. Энэ бол түүнийг дэлхийн том хот гэдгийг харуулах ганцхан, гэхдээ хангалттай жишээ. Шанхайд ирсэн хүн заавал үзэх газрын нэг бол "Дорнын гэрэлт сувд" нэртэй телевизийн цамхаг яахын аргагүй мөн гэнэ. 468 метр өндөртэй тэр цамхгийг, бас Хятадын хамгийн том худалдааны "Наньжин" гудамжийг үзээгүй бол "Шанхайд очсон гэж ярилтгүй гэцгээдэг юм" гэж дуулдсан. Таньд өдрөөс өдөрт, өндрөөс өндөрт тэмүүлэх барилгуудыг өгүүлж байтал үлэмж аварга аварга байгууламжуудын нутаг Шанхайг ярьчихлаа. Тиймээс энэ завшааныг ашиглаад Шанхайн тухай товч өгүүлье.

      Дэлхийн хот Шанхай.

      Орчин үеийн хятадын санхүүгийн төв болсон Шанхай хотын анхны оршин суугчид 6000 жилийн тэртээгээс анх суурьшсан гэдэг.1267 онд Хуанпү голын баруун эрэгт бяцхан хотыг албан ёсоор байгуулж Шанхай гэж анх нэрийджээ.Мин улсын дунд үеэс Хятадын гар урлалын үйлдвэрлэлийн төв болж өргөжсөн Шанхай өдгөө Хөх мөрний Номхон далай руу цутгах аманд 6340,5 кв.км талбайд, өмнөөсөө хойшоо 120 км сунаж, зүүнээсээ баруун тийшээ 100 км ханхайж үргэлжилдэг, 18 дүүрэгтэй хот. Бас 1 гацаа, 132 тосгон, 3 жижиг арлыг харьяалдаг бөгөөд Хятадын Засгийн газраас шууд удирддаг 4 хотын нэг, засаг захиргааны нэгж юм. Жилийн дундаж тимператур нь 17,8 хэм, дулаан бүсэд оршдог жилд 1427,9 мм тундас унадаг чийглэг уур амьсгалтай, 5-9 сарыг борооны улиралд тооцдог ийм хот. Орчин үеийн хятадын өөрчлөлт шинэчлэлт, хөгжил дэвшлийн толь болсон Шанхай эдүгээ 17 сая хүн амтай, нэг хүнд ногдох дундаж орлогоороо улсдаа тэргүүлж байгаа бөгөөд ДНБ 5000 ам доллараас давсан байна. 1978 онооос хойш эдийн засаг нь жилд дунджаар 9,8 %-ийн өсөлттэй явж ирсэн энэ хот одоо дэлхийн 160 гаруй улс, бус нутагтай худалдааны харилцаатай гэдэг. Энэ амжилт нь 90-ээд оноос хойш эрч хүчээ авсан гэж үздэг юм.Өнөөдөр Шанхайд дэлхийн 36 улсын консулын газар үйл ажиллагаа явуулж буй. Мөн дэлхийн 45 хоттой найрамдалт харилцаатай. Өнгөрсөн оны 3-р сарын байдлаар дэлхийн өртөг өндөртэй хотуудын жагсаалтийн 30-д эрэмбэлэгдсэн байсан. Эцэст нь тэмдэглэхэд, өнөө Хятад улс Шанхай хотыг Ази Номхон далайн бүсэд тэргүүлэх үүрэг гүйцэтгэх чадвартай олон улсын аж үйлдвэр, санхүү, худалдаа, тээвэр, соёлын аварга төв болгох, цаашлаад дэлхийн хэмжээний гэсэн зорилттойгоор хөгжүүлж байна. Ер нь л, Шанхай холын гийчний сэтгэл татсан дэлхийн хот бүлгээ.

      Бид Шанхайн өндөр барилгуудын тухай тодруулбал 492 метр өндөр банк, санхүүгийн төвийн "Газар тэнгэрийг холбогч"-ийн талаар ярьж байсан. Тэгвэл энэнээс өндөр барилгыг Хятадын нийслэл Бээжин хотод барьж байнаа. Энэнээс өндөр гэхээр 500 гаран метр болж таарах нь ээдээ. Яг тийм. Дэлхийн худалдааны төвийн тэр цогцолбор 502,7 метр өндөртэй гэнэ. Хорин есдүгээр Олимпийн хотхонд сүндэрлэж буй ижилгүй цэнхэр дэлхийн хамгийн өндөр байгууламж энэ хавар ашиглалатад орох төлөвлөгөөтэй юм билээ. Олимп үзэх гэж дэлхийн өнцөг булан бүрээс Бээжинд ирэх гийчид энэ үлэмж хэтэрхий байгууламжийг сонирхон дуу алдан шагшиж, ийм ижилгүй барилгыг хүн төрөлхтөнд бүтээж өгсөн Хятадын ард түмэнд тэргүүнээ мэхийлгэн гүнээ хүндэтгэл үзүүлэх байх аа. Би тэгэж бодож байна. Өндрөөс өндөрт тэмүүлэхийн жишээ энэ буюу. Дэлхийд хосгүй сайхан юм бүтээнэ гэдэг зөвхөн тухайн хотын, улс орны бахархал төдий бус хүн төрөлхтний соёлын өв, техник технилог, сэтгэлгээ, шинжлэх ухаанд оруулж байгаа асар их үнэт хувь нэмэр ажгуу. Үүнээс илүү бахархал гэгч юу байх билээ.

      Өдрөөс өдөрт Хятад орны хөгжил дэвшил эрч хүчээ авч байнаа. Олон жишээг дурьдаж ийм, ийм үзүүлэлтээр дэлхийд тэргүүлдэг хэмээн дурьдаж болно. Үүнийг түр хойш тавья. Хятадын хамгийн том мэдээллийн агентлаг Синьхуа хорооны мэдээ дэргэд минь байна. Түүнд 2007 онд Бээжин хотын хүн тутамд ногдох дотоодын үйлдвэрлэлийн нийт хэмжээ нь анх удаагаа 7000 ам доллароос давсныг Бээжин хотын Статистикийн газрын мэдээнд онцолсонг тэмдэглэжээ. Уг газрын хэвлэлийн төлөөлөгч Юй Шючинь хэлэхдээ, 2007 онд Бээжин хотын дотоодын нийт үйлдвэрлэлийн хэмжээ 900 гаруй тэрбум юаньд хүрлээ. Бээжин хотод байнгын оршин суугаа хүн амыг 16 сая 330 мянгаар тооцвол, нэг хүнд ногдох дотоодын үйлдвэрлэлийн хэмжээ нь 56 мянга гаруй юаньд хүрсэн байна гэжээ. Хойтон өдийд энэ тоо лав өссөн дүнтэй байх биз ээ. Өдрөөс өдөрт.

     "Наран тойрог" нэвтрүүлгийн 7 дахь дугаараар "Өдрөөс өдөрт-Өндрөөс өндөрт" тэмдэглэлийн дэд бүлгийг сонсголоо. Бэлтгэж, хөтөлсөн Цэрэнжамцын Дашдамба, найруулагч