|
ХОУР-гийн залуу сонсогч Дамдинсүрэнгийн Тоддаваа Бээжинд ирж бидэнтэй уулзаад гарахдаа өөрийн бичсэн жижигхэн шүлгийн номоо бэлэглэсэн юм. Ингээд та Д. Тоддаваагийн бичсэн дараах мөрүүдээс амтархан сонирхоно уу.
Хаврын урь ороход
Хайрын дууль хавтасаа дэлгэнэ
Хайлж буй цас шиг миний сэтгэл урсахад
Хамгийн сайхан зүүднүүд
Хайрын хүслээр амилж
Гарцаагүй үнэн сэтгэлийн бороо
Ганцхан чиний зүгт шивэрнэ.
****
Хайртай байсан минь
Үнэнээс үнэн
Харин чи надад
Үлгэр шиг л
Худал санагддаг
Тэврэхэд чинь одсон
Миний хонгорхон нас шиг
Тэрний маргааш чи
Миний амьдралаас явсан
Бурхан чамд дурласан уу
Буг чөтгөр чамайг дуудсан уу
Бүү мэд дээ,
Би одоо "ГАНЦААРАА".
****
Нэрийг нь мэдэхгүй ээ
Нэгэн ховор цэцэг
Надад байсан юм
Зугуухан ургадаг байсан тэр цэцэг
Зуун зуун өдөр шөнө ургахдаа
Зүрх сэтгэлийг даган ургадагийг
Мэдээгүй л явж дээ
Нэг хүнээс л холдсоноос хойш
Нээрэн л хэдэн сар турш
Өнгө нь гундаж, шарласаар
Нулимсгүй ч гэлээ уйлсан байх даа...
....нэг өглөө босоод ирэхэд
үхчихсэн байсан.
Бэлэг болж ирсэн тэр цэцэг
Бэлэглэсэн эзнийхээ
Нууцхан сэтгэл нь байсан юм бол уу?
****
Бэлэг
Тэр шөнө намрын шөнө байсан
Тэнгэрийн эрхэст хэсэгхэн үүл сэмрээд
Тэр үүлсээс зөөлөн бороо шиврээд
Тэргэл саран дэргэд нь гийж байсан.
Сарны гэрэлд бороон дусал цайраад
Санаандгүй учралд царай нь туяараад,
Сар, од, үүл, бороон дусал,
Сайхан бүсгүй, орчлон тэр чигээрээ
Миний л дэргэд байсан.
Ирэх гэж удсан шигээ мөнхрөх хайрын
Ийм л шөнийг мөрөөдөж явсан юм
Тийм ээ, чин хүслийн биелэл
Тэгэхдээ бас хайрын бэлэг
Тэргэл саран шиг
Тийм сайхан бэлэг.
|
