Ред: Бид өнөөдрийнхөө нэвтрүүлгээр таньд нэгэн зөвлөгөө өгөх гэсэн юм. Таньд, таний анд нөхдөд хэрэг болно гэж бодож байна.

     Ред: БНХАУ-ын ЗГ 2008 оны Бээжингийн олимпийн наадмын аюулгүй байдлыг хангах ажилд ихээхэн ач холбогдол өгч, олон төрлийн арга хэмжээ авч байна. Энэ ажлын хүрээнд тус улсын хууль хяналтын байгууллагууд гадаадын иргэдийн бүртгэл, оршин суух дүрэм журмыг чангатгаж байгаагаас гадна гадаадынхан оршин суудаг байр, хороолол, зочид буудлуудаар байнгын хяналт, шалгалт хийж визийн зөрчилтэй, хууль бусаар оршин суугаа гадаадыг иргэдийг илрүүлэн торгох, баривчлан саатуулах, албадан гаргах зэрэг арга хэмэжээ авч байна.Үүнтэй холбогдуулан МУ-аас БНХАУ-д суугаа ЭСЯ, Хятадад зорчиж буй иргэддээ хандаж дараах зөвлөлгөөг өгч байна.

     Үүнд:- БНХАУ-ын холбогдох хууль тогтоомж, ард түмний ёс заншлыг хүндэтгэн сахих.

     - Хэрвээ удаан хугацаагаар болон байнга оршин суухаар бол өөрийн санаачилгаар Хятад улсад суугаа өөрийн улсын ЭСЯ болон консулын газартаа бүртгүүлэх. Хэрэв яаралтай нөхцөл байдал үүсвэл ЭСЯ болон Консулын газар цаг алдалгүй мэдэгдэх.

     - Паспорт, зорчих бичиг баримтаа биедээ байнга авч явах, түүнийг бусдад дамжуулах, барьцаалах, алдаж үрэгдүүлэхгүй байх.

     - БНХАУ-ын нутаг дэвсгэрт албаны болон хувийн хэргээр 30-оос дээш хоногийн хугацаагаар оршин суух бол УБ дахь БНХАУ-ын ЭСЯ-наас виз заавал авах. /дипломат, албан, энгийн ямар ч паспорттайг үл харгалзан/

     - Оршин суугаа газрынхаа цагдаагийн байгууллагад 24 цагийн дотор бүртгүүлэх, харин зочид буудалд байрласан тохиолдолд зочид буудлын захиргаа бүртгэлийн асуудлыг хариуцах болно.

     - Бусдын заль мэхэнд автагдан хууртаж хар тамхи, мансууруулах бодис болон хүн худалдах гэмт хэрэгт өртөх, хуулиар хориглосон бараа,эд зүйлсийг хилээр нэвтрүүлэх зэргээр хил дамнасан зохион байгуулалттай гэмт хэрэгт холбогдохоос онцгой сэрэмжлэх. Зөвхөн 2007 онд БНХАУ-д манай улсын 8 иргэн хар тамхи, мансууруулах бодис, зөөвөрлөсөн гэмт хэрэгт холбогдон 15 жилээс хугацаагүйгээр шоронд хоригдон ял эдлэхээр шийтгэгдээд байна.

     - Согтууруулах ундаа хэтрүүлэн хэрэглэх, орон нутгийн хүмүүстэй маргалдах, нийгмийн хэв журам зөрчих, элдэв хэрэг зөрчилд холбогдохоос болгоомжилж зайлсхийх.

     - Гадагш гарахдаа биедээ үнэт эдлэл, их хэмжээний бэлэн мөнгө авч явахгүй байх, такси, нийтийн ундаанд болон үйлчилгээ, олон нийтийн газар, эд зүйлсээ орхихоос болгоомжлох, таксинд суухдаа жолоочийн нэр, хувийн дугаар, машины дугаар зэргийг тэмдэглэж авах.

      - Хэрэв паспорт, зорчих баримт бичгээ алдаж үрэгдүүлэх, бусдад зодуулах, дээрэмдүүлэх, залилан мэхлэгдэх зэргээр ямар нэгэн хэрэг явдалд өртвөл тухайн нутаг дэвсгэрийнхээ цагдаагийн газарт нэн даруй мэдэгдэн хэрэг бүртгэлт хийлгэх, дүгнэлт доторхойлолт гаргуулж авах төдийгүй, энэ талаар ЭСЯ, Консулын газартаа цаг алдалгүй мэдэгдэж эрх ашгаа хамгаалуулах, алдагдсан баримт бичгээ дахин хийлгэх зэрэг ажлуудыг амжуулбал зохино.гэж ууг зөвлөгөөнд дурьджээ.

     Ред: "Наран тойрог" нэвтрүүлэг 25 дахь дугаараараа БНХАУ-д зорчиж яваа таньд зөвлөгөө өглөө. Эрхлэн бэлтгэсэн Цэрэнжамцын Дашдамба.