Ховд аймгийн Алтай сумын малчин Өлзийбадрах овогтой Далайцэрэн манай радиогоос зохион явуулж буй "Үзэсгэлэнт Сычуань" асуулт хариултын уралдаанд оролцсоны зэрэгцээ бидний нэвтрүүлэгт үнэтэй санал хүсэлтээ илгээсэн юм. Тэр захиандаа: "Миний бие Ховд аймгийн Алтай сумаас танай нэвтрүүлгийг байнга сонсдог танай байнгын сонсогчийн нэг нь байна. Та бүхний бэлтгэн явуулдаг олон олон сайхан нэвтрүүлгүүдийг сонсох дуртай байдаг юм аа. Саяхан шинэ жилийнхээ босгон дээр ажлаа дүгнүүлж Монголынхоо олон сонсогчдын талархлыг хүлээн шилдэг ажилтнаар шалгарсан нэвтрүүлэгч Урангоо эгчдээ хожимдсон хэдий ч баяр хүргэе. Цаашдаа улам хичээн ажиллана гэдэгт Монголын мянга мянган сонсогч тань итгэж байгаа шүү. Бас ийм сайхан боломж олгож өгч байгаа танай радиогийн нийт хамт олонд баярласнаа илэрхийлмээр байна. Би танай радиогоос зохион явуулж байгаа "Үзэсгэлэнт Сычуань" асуулт хариултын уралдаанд өөрийн мэдлэг чадвараа дайчлан оролцлоо. Хөдөө малчин болохоор та бүхэнтэй тэр болгон холбогдож болохгүй байдаг юмаа. Хөдөөний малчин бидэнд хэрэгтэй мэдээлэл өгч, оюуны хөрөнгө оруулалтад үнэтэй хувь нэмэр оруулахаар олон сайхан нэвтрүүлэг явуулж байна гэдэгт итгэж байна.

      Жишээлбэл: Малчдын амьдралд хэрэгтэй мал аж ахуйгаа өсгөн үржүүлэх түүний ашиг шимийг өндөржүүлэх зорилготой сургалт мэдээллийн чанартай нэвтрүүлгүүдийг өргөнөөр явуулж байвал зүгээр юмаа. Бас хэрэглээний хятад хэлний хичээлийг байнга давтан нэвтрүүлдгээ болимоор байна. Бас хятадаас гадна солонгос англи гэх мэт хэлийг заавал хэрэгтэй юмаа. Мөн Хятадын соёл боловсролын талаар мэдээллийг тэр болгон авч чадахгүй байгаа болохоор энэ талын мэдээллийг өргөн өгч чадна гэж итгэж байна. За та бүхэндээ ажлын өндөр амжилт хүсээд энэ захианыхаа уралдааныг амжилттай үнэн шударга шүүн явуулна гэдэгт итгэлтэй байна." гэж бичжээ.

      Дархан-Уул аймагт оршин амьдарч байгаа сонсогч Сонин овогтой Эрдэнэчимэг мөн бидэнд захиа илрүүлж мэдлэгийн уралдаанд оролцож байгаагаа мэдэгдсэний хамт манай радиогоор сонсохыг хүсэж байгаа нэвтрүүлгийн тухай ярьсан юм. Тэрээр захиандаа: "Юуны өмнө та бүхэндээ ажлын өндөр амжилт хүсье. Би Дархан -Уул аймгийн Дархан сумаас танай нэвтрүүлгийг сонсож байна. Хэрэгтэй цаг үеийн мэдээлэл өгч байдагт баярлалаа. Би хөдөө нөхөр хүүхдүүдийн хамт амьдардаг юмаа. Хөдөө орон нутагт сүлжээ сайн биш байгаа учраас нэвтрүүлгээ цаг тухайд нь сонсож чадаагүй улмаар асуулт хариултын уралдааны 5-р сэдвийг орхичихлоо. Цаг үеэ мэдэрч чадсан шинэ соргог мэдээллээр хангах хэрэгтэй байна. Та бүхний зохион явуулж буй уралдаанд мэдлэг оюунаа дайчлан оролцлоо. Миний хөдөлмөр хичээл зүтгэлийг хүлээн авна уу." гэлээ.