20-ийн бүлгийн Лондоны дээд хэмжээний уулзалт 2-ны өдөр өндөрлөв. Энэ дээд хэмжээний уулзалтын үр дүнд сэтгэл өндөр байгаагаа НҮБ, Олон улсын валютын сан, Америк, Энэтхэг, Франц тус тус илэрхийлж, уулзалтаас Дэлхийн банк, Олон улсын валютын сангийн байгууллагад хөрөнгө мөнгө нэмэхээр шийдвэрлэснийг сайшаав.
НҮБ-ын Ерөнхий нарийн бичгийн дарга Бан Ки Мун уулзалтын дараа мэдэгдэл хийж, 20-ийн бүлгийн удирдах хүмүүс энэ уулзалтаар эдийн засгийн хямралыг зохицуулах 1 триллион 100 тэрбум ам. долларын төсөл баталсныг би сайшааж байна гэж тэмдэглэсэн бөгөөд энэ төслийн ядуу орнуудыг туслан дэмжих агуулга нь бүр чухал юм гэж онцолжээ. Худалдааны ивээх үзлийг эсэргүүцэх талаар 20-ийн бүлгийн удирдах хүмүүсийн хийсэн амлалтыг тэрээр мөн сайшаалаа.
Олон улсын валютын сангийн байгууллагын Ерөнхий захирлын 1-р орлогч Жон Липски хэлэхдээ, өөрчлөлт хийх болон хөрөнгө мөнгө нэмэх нь манай байгууллагын банк санхүүгийн хямралыг эсэргүүцэх хүчин чадлыг нэмэгдүүлэх болно гэжээ.
АНУ-ын Ерөнхийлөгч Барак Обама уулзалтын дараа хийлгэсэн хэвлэлийн бага хурал дээр хэлэхдээ, 20-ийн бүлэг хөгжиж байгаа орнууд, ялангуяа хамгийн ядуу орнуудад туслах эрс шуурхай арга хэмжээ авах хэрэгтэй гэсэн бөгөөд ивээх үзлийг эсэргүүцэх нь маш чухал юм гэж дахин нотолсон байна. \Цэцэн орчуулав\
Өдөр дутмын 
