Хятад улс олон улсын хамтын ажиллагаанд улам нааштай оролцоно

     Хятад улсын Дараг Хү Жиньтао ойрын хугацаанд НҮБ-ын төв байранд болох дээд хэмжээний хурлууд болон Питтсбургт болох 20-ийн бүлгийн удирдлагуудын банк санхүүгийн уулзалтад оролцоно. Хятадын ГХЯ-ны 15-ны өдөр хийлгэсэн хэвлэлийн бага хурал дээр, Хятадын өндөр зэргийн албан тушаалтан нар, Хятадын тал идэвхтэй, бүтээлч байр сууриар хуралд оролцоно, цаг уурын өөрчлөлт, цөмийн зэвсэг түгэн дэлгэрэхээс сэргийлэх, олон улсын банк санхүүгийн хямралтай тэмцэх зэрэг манай гаригийн халуун цэгийн асуудлаар, олон улсын хамтын нийгэмлэгтэй үр ашигтай хамтын ажиллагаа өрнүүлнэ гэж илэрхийлжээ.

     Цаг уурын өөрчлөлтийн асуудал бол хүн төрөлхтөнд тулгарч байгаа хамтын сорилт болно. 12-р сард Копенгагенд болох НҮБ-ын цаг уурын өөрчлөлтийн хүрээний хурал дээр, олон улсын хамтын нийгэмлэгийнхэн Киотогийн протоколын залгамж гэрээг туурвихаар чармайна. Гэтэл өнөө талуудын санал зөрөлдөөн хэвээр байсаар. НҮБ-ын Ерөнхий нарийн бичгийн дарга Бан Ги Муны санаачилгаар, энэ сарын 22-нд Нью-Йорк дэх НҮБ-ын төв байранд НҮБ-ын цаг уурын өөрчлөлтийн дээд хэмжээний уулзалт болно. Энэ удаагийн дээд хэмжээний уулзалтын талаар, Хятадын ГХЯ-ны орлогч сайд Хэ Я-фэй хэлэхдээ:

     "Дээд хэмжээний уулзалт талуудын эв санаа нэгтэй, хамтран ажиллаж, цаг уурын өөрчлөлттэй тэмцэхэд тустай. Талууд хамтын бөгөөд ялгаатай хариуцлага хүлээж, харилцан ашигтай ажиллах. Хамтаар чармайж байгаад, Копенгагений хурал амжилттай болоход тус төхөм үзүүлэх ёстой" гэжээ.

     Тэрээр хэлэхдээ: энэ удаагийн уулзалт дээр, Хятад улсын Дарга Хү Жиньтао үг хэлж, олон улсын хамтын нийгэмлэг хамтын ажиллагаагаа эрчимжүүлж, цаг уурын өөрчлөлтөөс болсон сорилттой тэмцэхийг уриалан дуудах бөгөөд цаг уурын өөрчлөлттэй тэмцэхэд авах Хятадын цаашдын арга хэмжээг мэдээлэх болно гэлээ.

     Аюулгүйн Зөвлөл 24-ний өдөр цөмийн зэвсгийг түгээн дэлгэрүүлэхгүй, цөмийн зэвсэг хорогдуулах асуудлаар дээд хэмжээний хурал хуралдуулна. Хэ Я-фэй цохон тэмдэглэхдээ: Хятадын тал цөмийн зэвсгийг түгээн дэлгэрүүлэхийг хатуу эсэргүүцнэ, цөмийн эрчим хүчийг энхийн зорилгод ашиглах үйл явцад идэвхтэй тус төхөм үзүүлж, цөмийн аюулгүй байдлыг эрчимжүүлэхийг зорино гэжээ. Тус удаагийн уулзалт дээр, Дарга Хү Жиньтао Хятадын талын холбогдох саналыг тал бүрээр тайлбарлан өгүүлнэ. Энэ удаагийн дээд хэмжээний уулзалт олон улсын нийтлэг ойлголтыг нягтруулж, цөмийн зэвсгийг хорогдуулах, цөмийн зэвсгийг түгээн дэлгэрүүлэхгүй байх, цөмийн эрчим хүчийг энх тайвны зорилгод ашиглах үйл явцыг тэнцвэртэй ахиулах талаар нааштай үүрэг гүйцэтгэхийг Хятадын тал хүсэж байна.

     20-ын бүлгийн удирдагчдын банк санхүүгийн 3-р уулзалт 24-25-ны өдрүүдэд Питтсбургт болно.

     Талуудын анхаарч байгаа олон улсын банк санхүүгийн байгууллагын өөрчлөлтийн талаар, Хятадын Ардын Банкны ерөнхийлөгчийн туслах Гүө Чинпин хэлэхдээ: Олон Улсын Валютын Сангийн Байгууллага өөрчлөлт хийхдээ, хөгжиж байгаа орнуудын төлөөлөх чанар, үг хэлэх эрхийг нэмэгдүүлэхийг ерөнхий зорилтоо болгох хэрэгтэй. Питтсбургийн уулзалт хөгжсөн орнууд нь хөгжиж байгаа орон уруу санал оруулах эрхээ шилжүүлэх бодитой зорилтыг цаашид ахиулж, хөгжсөн орнууд болон хөгжиж байгаа орнууд Олон Улсын Валютын Сангийн Байгууллагад эдлэх санал оруулах тэгш эрхийг баталгаажуулах ёстой гэж бид үзэж байн гэжээ.

     Энэ удаагийн уулзалт дээр, Дарга Хү Жиньтао дэлхийн эдийн засгийг сэргээх, олон улсын банк санхүүгийн тогтолцооны өөрчлөлт, дэлхийн тэнцвэргүй хөгжлийг шийдэх зэрэг асуудлаарх Хятадын талын саналыг тодорхойлон өгүүлж, олон улсын хамтын нийгэмлэгтэй хамтын ажиллагаа өрнүүлж, банк санхүүгийн хямралтай тэмцэх Хятадын талын шуурхай байр суурийг илэрхийлэх болно. /Баясгалан орчуулав/