Хятад оронд хамгийн урт амралтын алтан долоо хоног тохиож аялал жуулчлалын зах зээл хөл хөгжөөнтэй байна

           Энэ оны Хятадын үндэсний баярын амралтын хугацаанд уламжлалт еэвэн сарын баяр тохиосноор 8 хоног амрах болж, урт амралтын алтан долоо хоног гэж нэрлэгдлээ. Ингэснээр банк санхүүгийн хямрал болон А төрлийн H1N1 томууны нөлөөгөөр төдий л хөгжөөнтэй биш байсан Хятадын аялал жуулчлалын зах зээл сэргэж, дотооддоо жуулчлах болон гадаадад жуулчилж байгаа хүмүүс маш ихээр нэмэгдсэн байна.

           Энэ жил Шинэ Хятад улс байгуулагдсаны 60 жилийн ой тохиосноор нийслэл Бээжинд үндэсний баярыг тэмдэглэх өргөн их цуглаан хийсэн юм. Үүний улмаар дотоод гадаадын жуулчид ч Бээжинд цугларч, үндэсний баярын өнөр хөгжөөнтэй байдлыг хуваалцлаа. Тянь Аньмэний талбайд байгаа баяр ёслолын чимэгт машинууд, өнгийн чийдэнгээр чимэглэсэн "Шувууны үүр" болон үндэсний усан спортын "Усан шоо" зэрэг нь жуулчдын зураг авч дурсгал үлдээх халуун цэг болж байна. Тянь Аньмэнь районы үндэсний баярын долоо хоногийн арга хэмжээг удирдах газрын хангасан мэдээнээс үзэхэд, Тянь Аньмэний талбайд 2 болон 3-ны өдөр зорчигчдын тоо бүр сая таван зуу мянгад хүрчээ. Энэ жил 74 насан сүүдэр зооглож яваа Гуань Линсү гэдэг настан тав, зургаан зуу километр холын Шаньшигаас тусгайлан Бээжинд хүрэлцэн ирж аялан жуулчилж байгаа юм байна. Тэрээр сэтгэл хөдлөн сэтгүүлчдэд хандан хэлэхдээ:\бичлэг 1\

           "Тянь Аньмэний талбайгаа харья гэж бодлоо. Үндэсний баяр болж, 60 жилийн ой тохиож байгаа тул маш их баяртай байна. Би тусгайлан Шаньшигаас үндэсний баярыг зорьж Бээжинд ирлээ. Ямар ч сайхан юм даа, маш гоё байна. Үндэсний баяр болох бүр зурагтаас хараад хүртэл сэтгэл их хөдөлдөг шүү дээ. Өнөөдөр би газар дээр нь харьж байгаадаа маш зол жаргалтай санагдаж байна" гэжээ.
Их олон шинэ хосууд ч бал сараа аялан жуулчилж тэмдэглэдэг болжээ. Саяхан Тяньжиний 60 шинэ хос Бээжинд хуримаа хамтаар хийгээд тэдний цөөн бус нь бал сараа мөн аялан жуулчилж тэмдэглэж байна.
Үндэсний баярын 60 жилийн ой тохиож байгаа тул энэ амралтаар Бээжинд жуулчлах нь бүр их учир утгатай нь аргагүй. Бээжин хотын аялал жуулчлалын газрын дарга хатагтай Жан Хуйгуан танилцуулж хэлэхдээ:\бичлэг 3\

           "Энэ оны үндэсний баярын алтан долоо хоног нь ийм онцлогтой, үндэсний баярын 60 жилийн ой тохиолоо, бас үндэсний баяр болон еэвэн сарын баяр давхацсан тул амралтын хугацаан нь урт болсон юм. Иймээрээ маш эрхэм нандин алтан долоо хоног боллоо гэж хэлж болох юм" гэжээ.

           Бээжингээс гадна, Хятадын бусад газруудын аялал жуулчлалын зах зээл ч маш их хөл хөгжөөнтэй байна. Сэтгүүлч Төвдийн Өөртөө Засах Районы аялал жуулчлалын газраас мэдээлснээр, 10-р сарын 1-ээс 3-ны өдрүүдэд, Төвдийн хүлээж авсан дотоод гадаадын жуулчид давхардсан тоогоор 110 мянгад хүрсэн байна. Үүнд 3-ны өдөр хүлээж авсан жуулчид давхардсан тоогоор 40 мянга орчимд хүрч, түүхэн шинэ тэмдэглэл болсон байлаа. Лхас, Линьжи, Шигаз бол дотоод гадаадын жуулчдын хамгийн их очдог аялал жуулчлалын дархан газар юм. Шиньжянгийн Ханас зэрэг аялал жуулчлалын нэрт газруудад жуулчид их очиж, Өрөмч хотын дүүргийн хөдөө тосгоны аялал жуулчлал ч хөл хөгжөөнтэй байж, зочид хүлээн авч байгаа хэмжээ нь энгийн үеийнхээс 2 дахинаар нэмэгджээ. Жэжян, Ханжөү ч алтан долоо хоногийн хугацаанд аялал жуулчлалын хямдрал зарлаж, дотоод гадаадын жуулчдын анхаарлыг ихээхэн татсан байна. Үүнээс гадна, Чиндао, Шанхай, Ши-Ань, Шямэньд ч жуулчид маш их очиж байна.

           Хятадынхан эх орноос гадна гадаад орнуудаар ч маш их жуулчилж байна. Энэ оны үндэсний баярын алтан долоо хоногийн хугацаанд Хятадынхан гадаадад жуулчилсан хэмжээ давхардсан тоогоор 200 саяас давах төлөвтэй байгаа юм байна.\Э.Цогзолмаа, Хүчит орчуулж, Г. Сайн-Өлзий хянав.\