Шанхайн Дэлхийн яармагийн парк нээгдэв

             5-р сарын 1-ний өдрийн 8 цаг 30 минутад Хятадын 2010 оны Шанхайн Дэлхийн яармагийн паркийн нээх ёслол болж, Шанхайн Дэлхийн яармаг зочид гийчдээ албан ёсоор хүлээн авч эхэллээ. Үүнээс Хойших 184 хоногт урдьчилсан төсөөллөөр Хятадын болон гадаадын 70 сая хүн Шанхайн Дэлхийн яармагтай танилцаж, хүн төрөлхтний гэрэл цацрангуй соёл, хамгийн тэргүүний шинжлэх ухаан техник, үзэл баримтлалыг ойлгон таних болно. Шанхайн Дэлхийн яармагийн зохион байгуулагчид, үзэсгэлэнд оролцогч талууд, ажилтнууд бэлтгэл ажлаа сайтар хийж, зочид гийчдэд хангамжтай, халуун найрсагаар үйлчилж, дэлхийн яармагийн энэ аялал жуучлал нь гайхамшигтай, мартагдашгүй гэснийг тэд нарт мэдрүүлэх болно.

             Парк нээх ёслол дээр Хятадын Ардын Улс Төрийн Зөвлөлдөх Зөвлөлийн Бүх Хятадын Хорооны дарга Жя Чинлинь, Олон улсын үзэсгэлэнгийн зөвлөлийн дарга Жеан-Пиерре Лафон хамтаар Шанхайн Дэлхийн яармагийн паркийг нээв.

             Олон улсын үзэсгэлэнгийн зөвлөлийн Ерөнхий нарийн бичгийн дарга Висенте Лоссерталес эн тэргүүнд Хятад улс, үзэсгэлэнд оролцогч талууд, ажилтнууд болон сайн дурынханд баяр талархал дэвшүүлэв. Тэрээр хэлэхдээ, ирэх зургаан сард олон улсын хамтын нийгэмлэг чин үнэнчээр хамтран ажиллаж, гайхамшигтай сайхан баяр наадам зохиохын төлөө хамтаар чармайхын хамт ирээдүйн хотын хөгжлийн асуудлыг тайван хайн хэлэлцэж, бүтээлч зөвшилцөл хийхийг би хүсэж байна гэжээ. Тэрээр хэлэхдээ,

             2010 оны Шанхайн Дэлхийн яармаг бол хүн төрөлхтний дэвшил амжилт бүтээлийг харуулах ёслол юм, энэ яармаг нь дэлхийн улс түмэн болон бидний хойч үеийнхнийг "Сайхан хот, сайхан амьдрал" гэсэн мөрөөдлийн төлөө цуцалтгүй хөөцөлдүүлөх болно. Энэ яармаг нь хамгийн амжилттай, гайхамшигтай, мартагдашгүй дэлхийн яармаг болж, бүх танилцагчдын сэтгэлд сайн сайхан дурсамж үлдээх болно гэдэгт би бат итгэж байна гэжээ.

             Хятадын Ардын Улс Төрийн Зөвлөлдөх Зөвлөлийн Бүх Хятадын Хорооны дарга Жя Чинлинь дараа нь үг хэлж, Хятадын 2010 оны Шанхайн Дэлхийн яармагийн яруу алдрын гэрч болж байгаа тал талын зочид гийчдэд баяр хүргэв. Тэрээр хэлэхдээ, 

             Өнөө бид Шанхайн Дэлхийн яармагийн паркт хуран цугларч, санаачлан бүтээсэн, өвөрмөц онцлогтой орднуудын үзмэрийг хамтаар сонирхож, шинжлэх ухаан техникийн баялаг сайхан ололт амжилтыг мэдэрч, оюун ухаан төгөлдөр төрөл бүрийн чуулга уулзалтад оролцож, хүмүүсийн сонирхлыг гүнээ татсан урлаг уран сайхны арга хэмжээг сонирхож байна. Бид лавтай амар тайван, эвсэг зохицонгуй байдалд амжилтад хүрч, санаачлан бүтээх эрч хүчнээс гайхамшгийг мэдэрч, баяр баясгалан, халуун найрсаг уур амьсгалыг мөнхжүүлж, хүн төрөлхтний соёл иргэншлийн дэвшлийн төлөөний уйгагүй хүсэл тэмүүлэл , хамтын хайн сүвэгчлэлийг бүх талаар харуулах болно. Аливаа бүхэн дэлхийн яармагаас эхэлж, аливаа бүхэн дэлхийн яармагт цугларлаа. Бид хамтаар Хятадын 2010 оны Шанхайн Дэлхийн яармагийн яруу алдрыг гэрч болцгооё гэжээ.

             Энэ удаагийн дэлхийн яармаг нь "Сайхан хот, сайхан амьдрал" уриан дор болж, нийт 246 улс орон, олон улсын байгууллага оролцож байна. Ирэх хагас жилд Хятадын болон гадаадын жуулчид дэлхийн яармагийн паркт орж, дэлхийн олон ургалч, гэрэл цацрангуй соёл, хамгийн тэргүүний шинжлэх ухаан техниктэй танилцаж, таван их тивийн 800 гаруй төрлийн 20 мянга орчим концерт тоглолтыг сонирхож болох юм. \Цэцэн орчуулав\