Вэнь Жябао Монгол улсад албан ёсны айлчлал хийж байна

    Хятад улсын ерөнхий сайд Вэнь Жябао 1-ний үдээс хойш Улаанбаатарт хүрч Монгол улсад хийх албан ёсны айлчлалаа эхэллээ. Энэ нь Хятад улсын ерөнхий сайд 16 жилийн дараа Монгол улсад дахин айлчилж байгаа болно.

    Айлчлалын хугацаанд Вэнь Жябао Монгол улсын ерөнхий сайд Сүхбаатарын Батболд, ерөнхийлөгч Цахиагийн Элбэгдорж болон Улсын Их Хурлын дарга Дамдины Дэмбэрэлтэй хэлэлцээ хийж, Хятад Монголын харилцаа зэрэг хамтаар сонирхож байгаа асуудлаар санал бодлоо гүнзгий солилцох юм. Вэнь Жябао мөн Монгол улсын олон салбартай өргөн хүрээнд уулзаж харилцаж, Хятад Монголын эдийн засаг худалдааны хамтын ажиллагааны чуулга уулзалтын нээлтийн ёслолд оролцож, Улаанбаатар дахь Хятадын Соёлын төвийг нээх юм.

    Айлчлалын хугацаанд хоёр тал банк санхүү, эрчим хүч, шинжлэх ухаан техник, дэд бүтцийн байгуулалтын салбар дахь хамтын ажиллагааны баримт бичигт гарын үсэг зурна.

    Хятадын тал энэ удаагийн айлчлалд гурван зүйлийн хүсэл эрмэлзэл тавьж байна. Нэгд, хоёр талын дээд зиндааны харилцан айлчлах сайн сайхан хандлагыг хэвээр байлгаж, засгийн газар, Парламент, улс төрийн намуудын олон салбар дахь солилцоог ахиулан, улс төрийн талаар бие биеэ ойлголцох болон харилцан итгэлцлийг эрчимжүүлж, хоёр орны харилцааны улс төрийн үндэс суурийг бэхжүүлэхийг эрмэлзэж байна. Хоёрт, эдийн засаг худалдааны хамтын ажиллагааг эрчимжүүлж, ялангуяа хоёр талын уул уурхайн эх баялгийг нээн ашиглах, дэд бүтцийн байгуулалт болон банк санхүүгийн салбар дахь хамтын ажиллагааг нэгдэлтэй төлөвлөн цаашид ахиулж, хамтын ашиг сонирхлоо өргөтгөн, харилцан ашигтай хамтаар ялахыг биелүүлэхийг эрмэлзэж байна. Гуравт, түүх соёлын салбар дахь хамтын ажиллагаагаа эрчимжүүлж, хоёр ард түмний харилцан ойлголцол найрамдлыг нэмэгдүүлэн, хоёр орны харилцааны хөгжлийн нийгмийн үндэс суурийг бататгахыг эрмэлзэж байна.

    Монгол улс бол Вэнь Жябаогийн энэ удаагийн Азид хийх айлчлалын гурав дахь орон болно. Үүнээс өмнө тэрээр БНСУ болон Японд айлчилсан бөгөөд Хятад, Япон, БНСУ-ын удирдагчдын гуравдугаар хуралд оролцсон юм. \Пэрлаймаа, Алтаннавч орчуулав\