Хятад, Монгол хоёр орны эдийн засаг, худалдааны хамтын ажиллагааны форум болов

     Хятад, Монгол хоёр орны эдийн засаг, худалдааны хамтын ажиллагааны форум 2-ны өдөр Монгол улсын нийслэл Улаанбаатар хотноо болж, Хятад, Монгол хоёр орны Ерөнхий сайд нар болон хоёр орны зам харилцаа, барилга байгуулалт, эрчим хүч, хүнсний бүтээгдэхүүний үйлдвэрлэлийн салбарын 200 гаруй хүн уг форумд оролцжээ. Хятадын Ерөнхий сайд Вэнь Жябао форумын нээлтийн ёслол дээр үг хэлэхдээ, хоёр орны эдийн засаг, худалдааны хамтын ажиллагааг эрчимжүүлэх талаар дөрвөн зүйлт санал дэвшүүлжээ. Үүнд Монгол улсад үзүүлэх эдийн засгийн тусламжийг нэмэгдүүлэх зэрэг агуулга хамрагдсан байна.

     Хятад, Монгол хоёр орон дипломат харилцаа тогтоосноос хойших 60 гаруй жилд, хоёр орны эдийн засаг, худалдааны хамтын ажиллагаа баялаг үр дүнд хүрсэн юм. 2009 оны эцсийн байдлаар, Хятад улс нь Монгол улсын худалдааны хамгийн том түнш орны байраа 11 жил дараалан хадгалж, Монгол улсад хамгийн их хөрөнгө оруулагч орны байраа 12 жил дараалан хадгалж ирсэн байна. Үүнтэй холбогдуулан, Ерөнхий сайд Вэнь Жябао хэлэхдээ: "Хятад, Монгол хоёр орны уламжлалт найрамдал бол бат бэх, эдийн засаг, худалдааны хамтын ажиллагаа нь эрх тэгш, харилцан ашигтай байгааг практик гэрчилж байна. Бид бол сайн хөрш, сайн түнш байгаа юм. Хятад, Монгол хоёр орон бүр түргэн хөгжиж буй үе шатанд байгаа бөгөөд хоёр талын эдийн засаг маш их харилцан нөхвөрлөх чанартай, эдийн засаг, худалдааны хамтын ажиллагааны хэтийн төлөв саруул уудам байгаа юм" гэжээ.

     Хөрөнгө оруулалтын том том төслүүдийг түргэхэн ахиулж, ард иргэдийн амьжиргааг голцуу сайжруулан, тогтолцооны байгуулалтын баталгааг түргэтгэж, бүс нутгийн хамтын ажиллагаанд нааштай оролцохыг Ерөнхий сайд Вэнь Жябао санал болгов. Тухайн нутгийн ард иргэдийн амьжиргааг сайжруулахтай холбоотой төсөлд Хятад улсын аж ахуйн нэгжүүдийн нэн их хөрөнгө оруулахыг урамшуулах бөгөөд Монгол улсад үзүүлэх эдийн засгийн тусламжийг алхам алхмаар нэмэгдүүлэхийг хүсч байгаагаа илэрхийлжээ.

     Монгол улсын Ерөнхий сайд Сүхбаатарын Батболд хэлэхдээ: "Өнгөрсөн хугацаанд Хятад улс нь дэлхий нийтийн аж үйлдвэрийн нэг чухал төв нь болж чадсан бол, одоо дэлхийн урт хугацааны өсөлтийн нэг эх үүсвэр нь болох зах зээл нь болж байна. Монгол улсын хувьд 21-р зуунд эдийн засгийн үсрэнгүй хөгжлийг авчрах томоохон төслүүд эхэлж байгаа шинэ гарааны өмнө бид зогсож байна. Манай улс бүс нутгийн хэмжээнд уул уурхайн бүтээгдэхүүнийг нийлүүлэгч болох үүд хаалга нээгдэж байгаа бөгөөд үүнд үндэслэн эрчим хүч, уул уурхайн боловсруулсан бүтээгдэхүүний салбарт бүс нутгийн хэмжээнд өрсөлдөх чадвартай тоглогч болох бүрэн боломжтой юм. Ийм ч учраас хөрш манай хоёр орны хувьд хөгжлийн шинэ шатанд хамтдаа ялж хамтдаа хожих боломжийг бүрдүүлж байна. Хоёр улсын эдийн засгийн энэ шинэ боломжийг бүрэн дүүрэн, эрх тэгш, харилцан ашигтай байдлаар ашиглахын төлөө бид хамтран ажиллах нь зүйтэй юм" гэлээ.

     Хятад улс болон эргэн тойрны улс орнууд хоорондын сайн хөршийн хамтын ажиллагааны тухай Ерөнхий сайд Вэнь Жябао хэлэхдээ, Хятад улс эргэн тойрны бүс нутгийн энх тайван, тогтвортой байдал, хөгжил цэцэглэлийг хамгаалахын төлөө хүчин чайрмайлт гаргана гэжээ.

     "Хятад улс хөрштэйгээ найзалж, хөрштэйгээ түншлэх чиг шугам болон сайн хөрш, амгалан хөрш, чинээлэг хөршийн бодлогоо хэлбэрэлтгүй хэрэгжүүлэн, эргэн тойрны бүс нутгийн энх тайван, тогтвортой байдал, хөгжил цэцэглэлийг хамгаалахын төлөө хүчин чармайлт гаргана. Хятад улс Монгол улстай үүрдийн сайн хөрш, сайн найз, сайн түнш болох чин үнэнч хүсэлтэй байна" гэж тэр тэмдэглэв. \О.Дарамбазар орчуулав.\ Пэрлаймаа хянав\