Зүүн үзэмчний мөнгөн өвлийн наадам

            2012 оны 1-р сарын 15-ны өдөр, их Хянган давааны баруун суга, Өвөр Монголын Шилийн гол аймгийн зүүн хойд биеэр орших Үзэмчин зүүн хошууны "Өлзийт үзэмчний тал нутаг" хэмээх 7-р удаагийн мөнгөн өвлийн наадам, мөн ӨМӨЗР-ы "Үзэмчин цом" монгол үндэстний өвлийн улирлын хувцас заслын тэмцээн тус хошууны төв Улиастайн наадмын талбайд эхэллээ. Гурав есийн хүйтэн жавар сөрж, цан хүүрэг савсуулсан мөнгөн өвлийн наадамд 128 бөх барилдах ба нум сум харвах бөгөөд морины уралдаан, тэмээний уралдаан, мөн өвлийн улирлын монгол үндэстний хувцас заслын уралдаан явагдсан юм. Наадмын хугацаанд морин чарга, тэмээн чарга, мөн үзэмчин дээл хувцасны үзэсгэлэн боллоо.

наадмын эхлэл

            Уламжлал болгон зохиодог зүүн Үзэмчний мөнгөн өвлийн наадам нь удалгүй болох цагаан сарын баярт зориулсан болохоор есөн тулга тавьж гал дахих ёслол болох ба малчдын сар шинээ угтах уран сайхны үдэшлэг болж, Үзэмчний тухай шинэ дуунуудыг дуулах үдэшлэг ч болох юм.

            Ташрамд сонирхуулахад Шилийн гол аймгийн Үзэмчин зүүн хошуу нь Монгол Улсын Сүхбаатар аймагт хиллэж байгаа бөгөөд зүүн Хатавч боомт тус нутагт байдаг юм. \Ч.Гантөмөр, Болор, Ундрах үзэмчин зүүн хошуунаас мэдээлэв\