Цагаан сарын үеэр хэрэглээний зах зээл их хөгжив

       Саяхан өнгөрсөн цагаан сарын алтан долоо хоногийн амралтын хугацаанд, Хятадын хэрэглээний зах зээл  их хөгжсөн байна. Хятадын худалдааны яамны хяналт бүртгэлээс үзэхэд, битүүнээс шинийн зургаан хүртэлх хугацаанд, Хятадын гол чухал хяналт бүртгэлд хамрагдсан жижиглэнгийн худалдаа болон гуанз рестораны салбарын худалдааны нийт хэмжээ нь 539 тэрбум юаньд хүрсэн нь өнгөрсөн оныхоос 14.7%-иар өссөн байна. зах зээл их хөгжиж байгаа боловч, арвилан хэмнэлт нь аажмаар нийгмийн шинэ үзэл суртал болж байна. 

       Жил болгон цагаан сарын амралт дуусахаар олон хүмүүс баярын өдрөөр садан төрөл, найз нөхдийнхөө бэлэглэсэн бэлэг сэлтийг хямдхан үнээр худалдаж, мөнгө төгрөг болгодог. Тийм ч учраас баярын  амралтын хугацаа дуусахаар нь бэлэг дурсгалын бараа бүтээгдэхүүн эргүүлэн наймаалдаг дэлгүүр худалдаа хамгийн их хөгжин, гүйлгээ сайтай үе байдаг. Гэтэл, энэ жилийн баярын амралтын дараа эдгээр дэлгүүрийн гүйлгээ маш муу байгааг сэтгүүлч Бээжингийн хэдэн  дэлгүүрээс ойлгож мэдээллээ. 

       Бэлэг дурсгалын бараа бүтээгдэхүүний дэлгүүрийн захирал хэлэхдээ, өмнө нь голдуу нэртэй брэндийн  архи тамхи байдаг байсан бол хожим нь барааны төрөл өргөжиж,  эрүүл ахуйн хүнсний бүтээгдэхүүн, дэлгүүр, супермаркетын мөнгөний тэмдэгт зэргийг ч эргүүлэн худалдаж авах болсон байна. Тэгсэн хэдий ч энэ жилийн наймаа нь сайн биш байгаа гэлээ. Дэлгүүрийн нэгэн худалдагчийн хэлснээр, үнэтэй архи, тамхины борлуулалт ч өнгөрсөн оныхоос 30 орчим хувиар багассан гэв. Тэрээр хэлэхдээ:

       "Нэртэй брэндийн үнэтэй архи, тамхи худалдаж авах хүн цөөрч, хүмүүс бүгд л энгийн хэрэглээний 20-30 юаний, хамгийн ихдээ л  100 гаруй юаний архи, тамхи худалдаж авах болсон" гэв. 

       Шинжээчдийн үзэж байгаагаар, цагаан сарын баярын үеэр бэлэг дурсгалын эд зүйлс эргүүлэн худалдаж авдаг дэлгүүр болон нэртэй брэндийн архи, тамхины гүйлгээ сайн биш байгаа нь сүүлийн үед Хятадын нийгэм даяар өрнөсөн арвилан хэмнэлт, үрэн таран хийх байдлыг арилгах, мөн албан хаагчид ариун шударга байх зэрэг үзэл сурталтай нягт холбоотой юм. 

       Энэ жилийн цагаан сарын үеэр, гуанз рестораны зах зээлд ч нэлээд олон өөрчлөлт гарч, хүмүүс гэр бүлээрээ, найз нөхдүүдтэйгээ хоолонд орохдоо боломжийн хирээр үрэн таран хийх байдлаа арилгаж, хоол зуушаа ихээр үрэн таран хийхгүй байхыг хичээх болжээ. Өндөр дээд зэрэглэлийн гуанз рестораны наймаа өнгөрсөн оныхоос илт буурч, харин битүүний хоол, найз нөхөд хоорондын нийллэгийн ширээ зэрэг олныг хамарсан хоолны борлуулалт маш сайн байж, зарим гуанз ресторан кафены төлбөр, хамгийн доод үнэ зэргийг хүчингүй болгосон төдийгүй мөн  "хагас үнийн зууш", "хэмжээг нь багасгасан хоол" зэрэг үйлчилгээг гаргаж, хүмүүсийн үлдсэн хоол зуушийг савлаж өгөхийг ч төлбөргүй болгосон байна. 

       Хятадын ХЯ-ы зах зээлийн эрхлэлт болон хэрэглээг дэмжих газрын хяналт бүртгэлийн албаны дарга Чэнь Пингийн үзэж байгаагаар, энэ жилийн цагаан сарын амралтын үеийн зах зээлд арвилан хэмнэх үзэл суртал ихээр дэлгэрч, оршин суугчдын хэрэглээний үзэл ойлголт улам боловсронгуй болсон байна гэв. Тэрээр хэлэхдээ: 

       "Цагаан сарын үеийн зах зээлийн онцлогийг ажвал, Хятадын хот хөдөөгийн оршин суугчдын хэрэглээний үзэл баримтлал улам боловсронгуй болж, борлуулалт их, ашиг багатай хэрэглээний загвар нь цаашдын хэрэглээний зах зээлийн хөгжлийн чиг хандлага болох болно" гэжээ.

\Д.Х\