БНСУ-ын тамирчин Хойд Солонгост болсон тэмцээнээс алтан медаль авлаа

          БНАСАУ-ын нийслэл Пхеньянд 14-ний өдөр зохиогдсон 2013 оны Азийн аварга шалгаруулах хүндийн өргөлтийн тэмцээнээс БНСУ-ын тамирчин алтан медаль авч, Хойд Солонгос улсад анх удаа төрийн дууллаа эгшиглүүлж, төрийн далбаагаа мандуулжээ.

          Хойд Солонгосын төв мэдээний агентлагийн мэдээлснээр, БНСУ-ын тамирчин Ким Ю Сик, Лее Ёнг Гун нар өсвөр үеийн 85 кг-ын жинд алт болон мөнгөн медаль, Ли За Куан 94 кг-ын жинд хүрэл медаль хүртжээ.

          Сурвалжаас үзвэл, энэ удаагийн хүндийн өргөлтийн аварга шалгаруулах тэмцээн 11-17 -ний өдрүүдэд Пхеньян хотын " Зен Зо Юнг"спортын ордонд өсвөр үе болон насанд хүрэгсдийн ангиллаар зохиогдож байгаа бөгөөд БНАСАУ, Хятад, Узбекистан, Кувейт, Энэтхэг, Таиланд зэрэг 16 орны тамирчид тэмцээнд оролцож байна. \Н. Пүрэвжав орчуулав\