Ши Жиньпиний БРИКС, ШХАБ-ын дээд уулзалтанд оролцох хөтөлбөрийг танилцуулав

6-ны үдээс өмнө Хятадын ГХЯ Бээжинд хэвлэлийн бага хурал хийж, Хятад улсын дарга Ши Жиньпин ОХУ-ыг зорьж, БРИКС болон ШХАБ-ын дээд уулзалтад оролцох тухай танилцуулжээ. ГХЯ-ны дэд сайд Чэнь Гүөпин хэлэхдээ: Хятад улс энэхүү айлчлалаар дамжуулж, БРИКС, ШХАБ-ын орнуудын ажил хэрэгч хамтын ажиллагааг ахиулж, харилцан ашигтай хамтран ажиллах, ашиг сонирхлоо нэгтгэх хувь заяаны хамтын цогцыг байгуулахыг хүсэж байна гэжээ.

Энэ долоо хоногт Хятад улсын дарга Ши Жиньпин ОХУ-ыг зорьж, Уфад болох БРИКС-ийн удирдагчдын 7 дахь уулзалтад оролцоно. Ши Жиньпин гурав дахь удаагаа БРИКС-ын удирдагчдын уулзалтанд оролцож байгаа юм. Хятад улс БРИКС хоорондын хамтын ажиллагааг маш чухалчилж байгааг харуулж байна гэж ГХЯ-ны дэд сайд Чэнь Гүөпин хэллээ.

Тэрээр хэлэхдээ, таван удирдагч жижиг хэмжээний уулзалт хийж, БРИКС-ийн хамтын ажиллагаа болон харилцан анхаарал хандуулж буй олон улсын болон бүс нутгийн асуудлаар санал бодлоо солилцон, хурлын дараа "Уфа-гийн тунхаг" нийтэлж, холбогдох нийтлэг ойлголцлоо мэдэгдэнэ. Уулзалтын үеэр БРИКС-ын удирдагчид ШХАБ-ын гишүүн орон, ажиглагч орон, олон улсын байгууллагын хариуцах хүнтэй уулзалт зохиож, БРИКС-ын Үйлдвэр худалдааны зөвлөлийн төлөөлөгчидтэй хэлэлцээр хийнэ.

Өнөөдрийн байдлаар БРИКС-ийн орнуудын хамтын ажиллагаа тасралтгүй эрчимжиж, олон улсын үйл хэрэг дэх хэлхээ холбоо цаашид гүнзгийрэхийн хирээр дэлхийн эдийн засгийн өсөлтийг дайчлах, эдийн засгийн орчныг цэгцлэх, түүнчлэн олон улсын харилцааны ардчиллыг урагшлуулах чухал хүчин болж байна. Энэ удаагийн БРИКС-ийн орнуудын тэргүүн нарын уулзалт нь "БРИКС-ийн орнуудын түншлэлийн харилцаа- дэлхийн хөгжлийн чухал хүчин зүйл" гэсэн уриан дор болно. Чэн Гүөпин хэлэхдээ: Хятад улс нь БРИКС-ийн орнуудын хамтын ажиллагааны чухал дэмжигч бөгөөд нааштай оролцогч юм. Уфагийн уулзалтаар дамжуулж, БРИКС-ийн орнуудын түншлэлийн харилцааг байгуулж, олон улсын үйл хэрэгт улам чухал үүрэг гүйцэтгэн, БРИКС-ийн орнуудын "Нэг бүс нэг зам", Азийн дэд бүтцийн хөрөнгө оруулалтын банкны талаар тохиролцсон нийтлэг ойлголтыг гүнзгийрүүлж, дэд бүтцээр холбох хамтын ажиллагааг ахиулна гэв.

Өнөөдрийн байдлаар Украйн Сирийн асуудлаар Орос ба өрнөдийн орнууд хүч сорьж байна. "Уулзалтын үеэр тус асуудлаар өрнөдийн орнуудтай өрсөлдөх эсэх" тухай сурвалжлагчийн асуултад Чэн Гүөпин хариулахдаа, " БРИКС-ийн орнууд нь шинээр хөгжиж буй зах зээл ба хөгжиж буй орны хамтын ажиллагааны индэр болж байна. Эдийн засаг, хөгжлийн асуудал нь чухал зүйл юм. БРИКС-ийн орнууд улс төр цэргийн холбоотон юм уу орнуудын групп биш, гуравдагч оронд чиглээгүй. Бидний хамтын ажиллагаа нээлттэй ил тод юм. Харилцан ашигтай хамтаар хожих зорилготой. Олон улсын харилцааны аргачлалыг харуулж байна" гэв.

Түүнчлэн ШХАБ-ын гишүүн орны тэргүүн нарын зөвлөлийн 15 дахь хурал жижигхэн хот Уфад болно. Чэн Гүөпиний цохон тэмдэглэснээр: Хоёр сарын дараа Ши Жиньпин ОХУ-ад дахинтаа очиж, ШХАБ-ын дээд хуралд оролцож байгаа нь Хятадын тал Европ Азийн бүс болон ШХАБ-ыг маш чухалчлан үзэж байгааг харуулж байна гэжээ.

Тэрээр хэлэхдээ: "Хятадын тал ШХАБ-ын талаарх үүрэг хариуцлагаа хүлээж, аюулгүйн хамтын ажиллагаагаа эрчимжүүлэх, гишүүн орны хөгжлийн стратегийг холбох, нийгэм соёлын солилцоог бодит агуулгатай болгох зэрэг санаачлага дэвшүүлсэн байна. Талууд энэ удаагийн дээд хэмжээний хурлаар боломж болгож, ШХАБ-ын шинэ ээлжийн хөгжлийг түргэтгэж, тус байгууллагын олон салбарын хамтын ажиллагааны түвшинг бүх талаар дээшлүүлж, олон улсын хэмжээн дэх нэр нөлөөгөө өргөтгөх талаар Хятад улс тус дөхөм үзүүлэх болно" гэжээ.

Гадаад харилцааны яамаас мэдэгдэхдээ, Ши Жиньпин, бусад гишүүн орны төрийн тэргүүнтэй хамт "Уфагийн тунхаг"-т гарын үсэг зуран, "2025 он хүртлэх ШХАБ-ын хөгжлийн стратеги"-ийг багтаасан баримт бичгүүдийг баталж, "ШХАБ-ын гишүүн орны хилийн хамгаалалтын хамтын ажиллагааны гэрээ"-нд гарын үсэг зурж, Энэтхэг, Пакистан ШХАБ-ын журамд элсэн орох зэрэг тогтоолыг баталж, фашизмын эсрэг дэлхийн дайны ялалтын 70 жилийн ойд зориулсан гишүүн орны төрийн тэргүүн нарын мэдэгдэл, мансууруулах бодистой тэмцэх асуудлаарх мэдэгдэл болон уг хурлын талаарх "албан мэдээ"-г нийтлэх болно гэжээ.