12 дахь удаагийн БХАТИХ-ын 5-р чуулганы хэвлэлийн төлөөлөгч Фу Ин 4-ний үдээс өмнө хэвлэлийн бага хурал дээр танилцуулж хэлэхдээ, энэ оны интернетийн аюулгүй байдлын хууль хэрэгжилтийн шалгалтын явцад хувь хүний мэдээллийг хамгаалахад түлхүү анхаарал тавих болно гэжээ.
Фу Ин хэлэхдээ, Интернет сүлжээний хөгжил болон том мэдээллийн эрин бидний амьдралд маш их тус дөхөм үзүүлж байна. Гэвч хувь хүний мэдээллийг хамгаалах тал дээр ноцтой сорилттой тулгараад байна. Энэ нь мөн дэлхийн чанартай асуудал болоод байгаа юм. Хятад улс интернетийн том гүрэн учир төвөгтэй сорилтуудтай тулгарч байна гэжээ.
Тэрээр хэлэхдээ, Хятад улс хувийн мэдээллийг олон талын хууль тогтоомжоор хамгаалж байдаг. 2012 онд БХАТИХ-ын байнгын хороо интернет сүлжээний аюулгүй байдлыг хамгаалахыг эрчимжүүлэх тогтоол баталсан. 2015 онд эрүүгийн хуулийн өөрчлөлт оруулсан төсөлд хувь хүний мэдээллийг хамгаалах заалт орсон. 2016 оны интернет сүлжээний аюулгүй байдлын хуульд хувийн мэдээллийг хамгаалах үндсэн дүрмийг тогтоосон юм. Удалгүй хянан хэлэлцэх гэж байгаа иргэний хуулийн ерөнхий заалтын төсөлд хувь хүний мэдээллийг хуулиар хамгаална гэж тодорхой тогтоосон юм. Яг одоо хянан хэлэлцэж байгаа цахим бизнесийн хуульд ч хэрэглэгчийн хувийн мэдээллийг хамгаалах тухай заалт орсон гэжээ.
Энэ онд интернет сүлжээний аюулгүй байдлын хуулийн хэрэгжилтэд шалгалт хийх гэж байна. Энэ үеэр олон нийтийн төвд орж байгаа асуудал болох хувийн мэдээллийг хууль бусаар наймаалах болон интернет сүлжээгээр залилан хийх асуудалд түлхүү анхаарал тавих болно. Хууль хэрэгжилтийн шалгалтаар дамжуулан хуулийг улам чанга хэрэгжүүлэх болно. Үүний зэрэгцээ шинэ техник, бизнесийн шинэ хэв загвар түргэн хөгжихийн хирээр хууль тогтоох ажилд шинэ сорилт учруулж байна. Хуулийн тогтолцоогоо улам боловсронгуй болгож цаг үеийн хөгжилтэй алхаа нийлүүлэх хэрэгтэй байна гэжээ. /Баатар орчуулав/
Өдөр дутмын 
