ХОУР-ын мэдээ: 6-нд БНСУ-ын Армийн Нэгдсэн Штабын Газар: БНАСАУ өнөө өглөө Пёнганпук мужаас Солонгосын хойгийн зүүн тэнгис руу 4 пуужин хөөргөжээ. Ийнхүү сар болоогүй хугацаанд хоёр дахь туршилтын пуужингаа хөөргөлөө гэжээ. БНАСАУ-ын Төв Цахилгаан Мэдээний Агентлаг 7-ны өдөр мэдээлэхдээ, дээд удирдагч Ким Чен Ун 6-ны өдөр Ардын Цэргийн Армиа удирдан Пуужин хөөргөх сургуулилт хийсэн гэжээ. Олон улсын хамтын нийгэмлэг тус хэргийг шүүмжилж, дахиж пуужин хөөргөхгүй байхыг БНАСАУ-ын талд шаарджээ.
6-нд НҮБ-ын ерөнхий нарийн бичгийн даргын хэвлэлийн төлөөлөгчийн орлогч Фархан Хач: НҮБ-ын ерөнхий нарийн бичгийн дарга Гутерриш БНАСАУ НҮБ-ын аюулгүйн зөвлөлийн шийдвэрийг зөрчиж пуужин хөөргөсөн явдлыг шүүмжилж, дахиж пуужин хөөргөхгүй байхыг шаардсан гэжээ. Тэрээр мөн өдөр Нью-Йорк дэх НҮБ-ын төв байранд болсон ээлжит хэвлэлийн бага хуралд хэлэхдээ: БНАСАУ дахиж Аюулгүйн зөвлөлийн шийдвэрийг зөрчихгүй байж олон улсын үүрэг хариуцлагаа биелүүлэхийг НҮБ-ын ерөнхий нарийн бичгийн дарга Гутерриш шаардаж байна гэв.
6-нд Хятадын ГХЯ-ны хэвлэлийн төлөөлөгч Гэн Шуан: БНАСАУ-ын баллистик пуужин хөөргөх үйл ажиллагааны талаар НҮБ-ын Аюулгүйн зөвлөлийн шийдвэр бий. БНАСАУ уг шийдвэрийг зөрчихийг Хятадын тал эсэргүүцэж байна гэжээ. Тэрээр: АНУ болон БНСУ хамтран БНАСА-д чиглүүлсэн нэгдсэн цэргийн сургуулилалт хийх гэж байгааг Хятадын тал анхаарч байна. Өнөөгийн нөхцөлд талууд хүлээцтэй байж бүс нутгийн асуудлыг хурцдуулахгүй байх хэрэгтэй гэжээ.
6-нд АНУ-ны Цагаан ордон мэдэгдэхдээ: БНАСАУ дахин пуужин хөөргөж байгаа нь өдөөн хатгалга бөгөөд бусад улс оронд сүрдүүлэг болж байна. Бид зохих арга хэмжээ авах болох гэжээ.
\Б.Дүүрэнжаргал орчуулав\
Өдөр дутмын 
