Өнөөдөр түүхнээ: Японы эсрэг дайн 1937.8.25

Өнөөдөр 8-р сарын 25, 1937 оны энэ өдөр, ХКН-ын төв хорооны цэргийн төв зөвлөлөөс Хятадын ажилчин, тариачны улаан армийн нэрийг иргэдийн хувьсгалт армийн 8-р замын арми хэмээн халах зарлиг гаргав.

Гоминьдан нам болон ХКН-ын тохиролцсон гэрээний дагуу ХКН-ын төв хорооны цэргийн төв зөвлөл 1937 оны 8-р сарын 25-нд армийг өөрчлөн байгуулах зарлиг гаргаж, Хятадын ажилчин, тариачны улаан армийн 1-р, 2-р, 4-р арми болон Шааньбэй-гийн улаан армийг өөрчлөн байгуулж, иргэдийн хувьсгалт армийн 8-р замын арми хэмээн нэрлэжээ. Улаан армийн гал фронтын ерөнхий удирдах газрыг 8-р замын армийн ерөнхий командлалын газар хэмээн нэрлэж, Жү Дэ-г ерөнхий командлагч, Пэн Дэ Хуай-г ерөнхий командлагчийн орлогч, Е Жянь Ин-г штабын дарга, Зүө Чуань-г штабын даргын орлогчоор тус тус томилов. Улаан армийн улс төрийн ерөнхий газрыг 8-р замын армийн улс төрийн ерөнхий газар хэмээн нэрлэж, Рэнь Би Ши-г дарга, Дэн Шяо Пин-г даргын орлогчоор томилов. 8-р замын армид 115-р, 120-р, 129-р дивиз болон ерөнхий штабын шууд харьяаны хүчнийг хамруулаад нийт 46 мянган цэрэгтэй болсон байлаа.

115-р дивизийн даргаар Линь Бяо, дэд даргаар Не Рүн Жэнь, штабын даргаар Жөү Күнь, улс төр, сурган хүмүүжүүлэх газрын даргаар Лүө Рүн Хуань нар ажиллаж, 343-р бригад, 344-р бригадыг тус дивизэд хамруулаад Чэнь Гуан, Шюй Хай Дүн нар тус тус даргаар ажиллав. Ингээд 115-р дивиз 15.5 мянган хүнтэй болжээ. 120-р дивизэд Хэ Лүн дарга, Шяо Кэ дэд дарга, Жөү Ши Ди штабын дарга, Гуань Шян Ин улс төр, сурган хүмүүжүүлэх газрын даргаар ажиллаж, 358-р бригад, 359-р бригадыг тус дивизэд хамруулаад Жан Зүн Шюнь, Чэнь Бө Жюнь нар тус тус даргаар ажиллав. Ингээд 120-р дивиз 14 мянган хүнтэй болжээ. 129-р дивизэд Лю Бө Чэн дарга, Шюй Шян Чянь дэд дарга, Ни Жи Лян штабын дарга, Жан Хао улс төр, сурган хүмүүжүүлэх газрын даргаар ажиллаж, 385-р бригад, 386-р бригадыг тус дивизэд хамруулаад Ван Хүн Күнь, Чэнь Гэн нар тус тус даргаар ажиллав. Ингээд 129-р дивиз 13 мянган хүнтэй болжээ. Үүнээс гадна ерөнхий штабын шууд харьяаны хүчинд 3000 гаруй цэрэгтэй байлаа. Мөн үүний зэрэгцээ 115-р, 120-р, 129-р дивизээс тус бүр хэсэг хүчнийг татаж, 8-р замын армийн арын хамгаалалтын 9000 гаруй хүнтэй газар байгуулаад, Шяо Жинь Гуан даргаар ажиллаж, Шань, Гань, Нин хилийн бүсийг сахин хамгаалж байсан юм.

8-р сарын 25-нд, Жү Дэ, Пэн Дэ Хуай нар тушаалдаа орсон мэдэгдэл гаргаж, бүх Хятадын ард түмэнд хандан: 8-р замын арми "байлдааны талбарт амь хайргүй тэмцэж, япон дээрэмчдийг устган, алдсан газраа эгүүлэн авч, Хятад улсын тусгаар тогтнол, эрх чөлөө, аз жаргалын төлөө эцэст нь тултал тэмцэнэ" хэмээн амласан юм.

9-р сарын 11-нд, Хятад иргэн улсын засгийн газрын цэргийн зөвлөл Бүх Хятад Улсын ус, агаар, хуурай замын цэргийн шинэ нэгдсэн журмын дагуу иргэний хувьсгалт армийн 8-р замын армийн нэргийг иргэний хувьсгалт армийн 18-р арми хэмээн халсан боловч 8-р замын арми гэж нэрлэж заншсан тул хүмүүс мөн ингэж дуудсаар байж билээ.

Улаан армийг өөрчлөн байгуулсны дараа ХКН-аас армийг удирдах ажлаа эрчимжүүлэхийн тулд 1937 оны 8-р сарын 22-нд, ХКН-ын төв хорооны улс төрийн товчооны Лүө Чуаны хурлаар тогтоол баталж, ХКН-ын төв хорооны хувьсгалт цэргийн төв зөвлөлийг байгуулсан юм. 29-нд, Цэргийн төв зөвлөлийн гал фронтыг удирдах хуваар хороог байгуулсан бөгөөд 8-р замын армийн дивиз болгонд улс төрийн газар байгуулах шийдвэр гаргажээ. 10-р сард, өмнө нь нэг үе хүчингүй болгоод байсан улс төрийн товчооны дүрмийг сэргээн хэрэгжүүлж, дивиз, бригад болгонд улс төрийн газар байгуулсан юм.

Гол болох улаан армийг 8-р замын арми хэмээн өөрчлөн байгуулсан нь нийт иргэдээрээ Японы түрэмгийллийн эсрэг дайнд оролцон, Хятадын умард нутгийн дайсны эсрэг фронт бүрдүүлж, дайны ялалтыг тэмцэн олоход асар чухал үүрэг гүйцэтгэсэн юм.