Өнөөдөр 11-р сарын 3, 1943 оны энэ өдөр, Хятад, Америкийн агаарын цэргийн нэгдсэн хүчин байгуулагдсан бөгөөд Гүйлиний баазад хүрэлцэн очиж, Японтой байлдаж эхэлсэн юм.
1941 оны 5-р сард, АНУ тус орны бэлтгэл хүчний офицерууд болон ус, хуурай замын армийн агаарын хүчнээс халагдсан хүмүүсийн Америкийн агаарын цэргийн сайн дурын хүчинд нэгдэн Хятад улсад ирж Японтой тулаан хийхийг зөвшөөрсөн юм. 6-р сард нь Хятад улс Америкаас 100 сөнөөгч нисэх онгоц худалдан авч, 7-р сард, Америкийн хуурай замын армийн агаарын хүчнээс халагдсан офицер Клайре Ли Чэннаултын байгуулсан Америкийн сайн дурын агаарын хүчин Мьянмарт ирсэн. 8-р сарын 1-нд, Хятадын агаарын армийн Америкийн сайн дурын хүчин албан ёсоор байгуулагдаж, Клайре Ли Чэннаулт командлагч нь болов. Тус сайн дурын хүчнийг "Нисэх онгоц үйлдвэрлэх төв компани" хэмээн нэрлээд, Күньмин хотноо байрлуулан, нийт 254 хүнтэй сөнөөгч нисэх онгоцны 3 бригадыг хамруулж, Мьянмарт дасгалжуулж эхэлжээ.
1941 оны 12-р сарын 20-нд, Америкийн сайн дурын хүчин Күньмин хотын агаараас тус хотод байсан Япон цэргийн нисэх онгоцыг бөмбөгдөж, анхны энэхүү агаарын тулалдаанаар дайсны 6 нисэх онгоцыг буудан унагааж, Японы түрэмгийллийн эсрэг Хятад Америкийн хамтран явуулсан анхны дайнд ялалт байгуулжээ. 1942 оны 5-р сард, Америкийн сайн дурын хүчин 8 нисэх онгоцоор 3 хоног дараалан Юньнань мужийн баруун хэсгийн Нүжян мөрний хавцал болон уулан зам дагуу байсан Япон цэргийг бөмбөгдсөнөөр, Япон цэргүүд мөрөн гатлах гүүр барьж чадсангүй Лүнлинд ухран оржээ. 1942 оны 1-р сард, Америкийн сайн дурын хүчин Хятадын агаарын цэргийг хамгаалан, Вьетнамын Жялинд байсан Японы нисэх онгоцны буудлыг 2 удаа нисэх онгоцоор бөмбөгджээ.
1942 оны 7-р сард, Америкийн сайн дурын хүчнийг жинхэнэ цэрэгт хамруулж, Америкаас Хятадад суугаа агаарын цэргийн тусгай хүчин хэмээн нэрлэв. Мөн оны 10-р сард, тус тусгай хүчний 12 бөмбөгдөгч нисэх онгоц 10 сөнөөгч нисэх онгоцны хамгаалалттайгаар Гүйлинь хотоос мордон, Хонконгд байсан Японы нисэх онгоцны буудлыг бөмбөгдөв. Японы талаас 26 нисэх онгоцоор тосон байлдсаны 20-г нь буудан унагаажээ. Америкийн талаас нэг онгоц эндсэн юм. 1941 оны 12-р сараас 1943 оны 6-р сар хүртэлх хугацаанд, Америкийн сайн дурын хүчин Японтой 102 удаа тулалдан, давхардсан тоогоор 512 удаа нисэх онгоц хөдөлгөж, Японы нисэх онгоцноос 193-г буудан унагааж, 75-г дэлбэлсэн ба ачааны 112 том машин, 15 агуулахыг дэлбэлжээ.
1943 оны 11-р сарын 3-нд, Хятадын болон Америкийн агаарын армиас тус бүр нэг бригадыг томилон, Клайре Ли Чэннаултыг командлагч, Шюй Хуанийг түүний орлогчоор томилов. Хятад Америкийн нэгдсэн хүчин байгуулагдсаны дараа, Хятадын агаарын арми болон Америкийн хуурай замын армийн агаарын 14-р бригадтай хамтран ажиллаж, Ханькөү, Вьетнам, Гуанжөү, Хонконг, Тайвань зэрэг газарт байсан Япон цэргийн агаарын хүчний баазыг бөмбөгдөж, Пин Хань, Юе Хань, Жинь Пү, Лүн Хай, Түн Пү зэрэг төмөр зам дагуу байрлаж байсан Япон цэргийн машин унаа, Хөх мөрөн болон тэнгис дагуух зогсоолд байсан хөлөг онгоц салуудыг дэлбэлж, Япон цэргийн ачаа тээврийн шугамыг эвдэж, Хятадын өмнөд болон төв нутгийг мэдэлдээ авч, Японы түрэмгийллийн эсрэг дайн буюу дэлхийн фашизмын эсрэг дайнд ялалт байгуулахад чухал хувь нэмрээ оруулсан юм.
Өдөр дутмын 
