Өнөөдөр түүхнээ: Японы эсрэг дайн 1943.11.18

Өнөөдөр 11-р сарын 18, 1935 оны энэ өдөр, ХКН-ын Төв Хорооны умард бүсийн товчооны удирдлага дор Бэйпингийн оюутнуудын холбоо буюу умард бүсийн оюутнуудын холбоо байгуулагдсан юм.

1935 оны сүүлийн хагаст, Япон түрэмгийлэгчид умард нутагт олон хэрэг хувьсал гаргаснаар байдал маш хурцдав. Олон хот суурин, хөдөө тосгоноор Япон дээрэмчид дүүрч, газар сайгүй япон бараа овоорон, япончуудын цэргийн сургуулийн бууны дуун үргэлжлэх болжээ. Бэйпин хотноо нэн ч аймшигт байдлаар дүүрч, Гоминьданы ноёд баядууд эд хөрөнгөө хумин авч зайлан зугтаж байсан ба Хааны ордны музейн түүхэн дурсгалт зүйлсийг өмнөд нутаг руу зөөж байсан төдийгүй "их сургуулиудыг нүүлгэхээр байна" гэсэн цуурхал яриа дэлгэрч байжээ.

Хүнд хэцүү энэ байдалд уурлан хилэгнэсэн Бэйпин хотын улс төрийн үзэл ухамсар өндөр оюутан залуус : "Хятадын умард хэсгийн өргөн уудам нутагт бичгийн ширээ тавих газаргүй боллоо" хэмээн уриа лоозон хашгирчээ.

Яг энэ үед, МаоЗэдүнгээр төлөөлүүлсэн ХКН-ын Төв Хорооны удирдсан улаан армийн гол хүчин урт замын аян дайн хийгээд Шааньши, Ганьсү-гийн хувьсгалын суурин газарт амжилттай хүрэлцэн очсон байлаа. Тухайн үед ХКН-нын Төв Хороо хэдийгээр коминтерны долоон зүйлт үзэл баримтлал болон "8-р сарын нэгний тунхаг"-ийн агуулгыг сонсоогүй байсан ч гэсэн тухайн цаг үеийн байдлыг үндэслэн, Японы түрэмгийллийн эсрэг нэн өргөн дэлгэр үндэстний фронт байгуулах асуудлыг судалж байжээ. 1935 оны 11-р сарын 13-нд, ХКН-ын Төв Хорооноос "Япон империалистүүд Хятадын умард нутгийг эзэлсэн болон ЖанКайши Хятадын умард нутгийг худалдан, Хятад улсыг худалдлаа" гэсэн тунхаглал гаргаж, Япон империалистүүд болон ЖанКайшигийн ноёрхлыг нураахын төлөө нийт Хятадын иргэд болон зэвсэгт хүчний холбоолон нэгдэхийг уриалсан юм. 11-р сарын дунд 10 хоногт, Жан Хао Зөвлөлтөөс эх орондоо буцан ирээд, Шаньбэй орж, ХКН-ын Төв Хороонд хандан,  фашизмын эсрэг өргөн дэлгэр нэгдмэл фронт байгуулах тухай коминтерны гаргасан үзэл баримтлалыг танилцуулжээ. Үүний дараа буюу 11-р сарын 28-нд, ХКН-ын Төв Хорооноос Бүгд Найрамдах Хятад Ард Улсын Төв Засгийн Газрын дарга МаоЗэдүн, Хятадын Ажилчин, Тариачин, Улаан Армийн Хувьсгалт Зөвлөлийн дарга ЖүДэ-гийн нэрээр "Японы түрэмгийллийг эсэргүүцэн, эх орноо аврах тунхаг" гаргасан юм. Энэ тунхгийн агуулга  "8-р сарын 1-ний тунхаг"-тай үндсэндээ адил байлаа.

Японы түрэмгийллийг эсэргүүцэн, эх орноо аврах гэсэн ХКН-ын санаачилга тухайн үеийн зонхилох хүний хүсэл мөрөөдлийг харуулсан болохоор нийгмийн олон давхаргад маш их тусгал гаргаж, Японы түрэмгийллийг эсэргүүцэн, эх орноо аврах гэсэн бүх Хятадын хөдөлгөөний эрч хүчийг дайчилж чадсан юм.11-р сарын 18-нд, ХКН-ын Төв Хорооноос Бэйпинд сууж байсан түр зөвлөлийн удирдлагатайгаар, Бэйпин хотын дунд сургууль, их сургуулиудын оюутан сурагчдын холбоо байгуулагдаж, оюутан сурагчдыг зохион байгуулан, эх оронч үйл ажиллагаа явуулж эхэлсэн юм.

12-р сарын эхээр, Бэйпингийн оюутан сурагчдын холбоо төлөөлөгчдийн анхдугаар хурлаа зохион байгуулж, бодит үйл ажиллагаа өрнүүлэн, Японы түрэмгийллийг эсэргүүцэн, эх орноо аврах шийдвэр гаргажээ. 12-р сарын 6-нд, олон сургуулийн оюутан сурагчдын бие даасан комиссууд хамтарсан мэдэгдэл гаргаж, "Коммунистуудын эсрэг өөртөө засах дэглэм" гэдэгтэй тэмцэн, Японы түрэмгийллийг эсэргүүцэн тулахыг Засгийн газартаа уриалсан бөгөөд 12-р сарын 9-нд бүх хотын оюутан сурагчид Японы түрэмгийллийн эсрэг их цар хэмжээний жагсаал явуулах шийдвэр гаргаснаа мэдэгдсэн юм. Бэйпингийн оюутан сурагчдын холбоо байгуулагдсан нь 1-р сарын 29-ний хөдөлгөөнд зохион байгуулалтын үндэс суурийг тавьсан байлаа.