Өнөөдөр 12-р сарын 9, 1935 оны энэ өдөр, Бээжин хотноо 12-р сарын 9-ний хөдөлгөөн эхэлсэн юм.
1935 оны сүүлийн хагаст, Япон дээрэмчид Хятадыг эзлэх алхмаа түргэтгэснээр умар нутгийн байдал огцом хурцадсан юм. Бэйпин хотын эх оронч оюутнууд: "Умард нутаг өргөн уудам ч гэлээ ганц ширхэг бичгийн ширээ тавих зайгүй боллоо" хэмээн уриа хашхирч байжээ. 12-р сарын 9-ний өдөр, ХКН-ын Бэйпин хотын түр комиссын удирдлага дор тус хотын оюутан сурагчдын холбооны хэдэн мянган эх оронч гишүүд Шинь хуа мэньд цугларан, Гоминьданы Бэйпингийн эрх баригчдад өргөдөл дэвшүүлжээ. Тэгэхэд Японы түрэмгийллийн эсрэг ардчилсан фронтын нэрийн өмнөөс оюутан сурагчдын гаргасан "Коммунист намаас татгалзан, өөртөө засна" гэдгийг эсэргүүцэх шаардлагыг тухайн эрх баригчид хүлээж аваагүй тул оюутан сурагчид жагсаал явуулжээ. Тэд: "Япон империалистүүдийг хөөн зайлуулъя", "Хятадын умард нутгийн өөртөө засахыг эсэргүүцнэ", "Дотоодын дайныг зогсоож, хүч хамтран Японтой тэмцье" гэх зэргийн уриа лоозон хашхирч байтал Гоминьданы цэрэг цагдаа харгис дарангуйлал явуулж, хэдэн зуун хүнийг бэртээсэн ба 30 гаруй хүнийг баривчилжээ. Дараа өдөр нь Бэйпингийн оюутан сурагчдын холбооноос олон сургуулиудад хандан, хичээл хаялт зарлажээ. 12-р сарын 14-ний өдрийн Бэйпингийн сонинд, 12-р сарын 16-нд Гоминьданы эрх баригчид Хэбэй, Цахрын улс төрийн комисс байгуулна гэсэн мэдээ гаргасан юм. Оюутан сурагчдын холбоо энэ мэдээг авсны дараа, 16-нд улам их цар хэмжээний жагсаал явуулах шийдвэр гаргажээ. 16-ны өглөө, Бэйпингийн олон сургуулийн оюутан сурагчид Тянь-ань мэний өргөн чөлөөнд цугларч, 30 мянгаад оршин суугчдын их хурал зохион байгуулж, "Хэбэй, Цахрын улс төрийн комиссыг хүлээж авахгүй", "Хятадын умард нутагт аливаа хэлбэрийн мануул захиргаа байгуулахыг эсэргүүцнэ" гэх зэргийн шийдвэрийг баталжээ. Хурлын дараа, оюутан сурагчид хотын иргэдийн хамт хэдэн арван мянган хүний их жагсаал явуулсанд цэрэг цагдаа мөн их хэмжээний дарангуйлал явуулан, хэдэн арван хүнийг баривчилж, 300 гаруй хүнийг шархдуулжээ.
Бэйпингийн оюутан сурагчдын Японы түрэмгийлэлтэй тэмцэн, эх орноо аврах хөдөлгөөн цагаан хэрэмний дотор гадна, хөх мөрний өмнө умар нутгаар хуй шуурганд ассан гал түймэр мэт огцом өргөжин тэлж, нийгмийн олон салбарын асар их дэмжлэгийг олсон юм. 12-р сарын 18-нд, Бүх Хятадын Үйлдвэрчний Ерөнхий Эвлэлээс ажилчдыг дайчлан Бэйпингийн оюутан сурагчдын эх орноо аврах хөдөлгөөнийг дэмжив. Үүний нөлөөгөөр олон газрын үйлдвэрүүд ажил хаяцгаав. Мөн олон газрын эх оронч зүтгэлтнүүд, хамт олон тунхаг болон цахилгаан мэдээ нийтэлцгээж, дотоодын дайныг зогсоож, цэргийн хүчийг Японы түрэмгийлэлтэй тэмцэхэд ашиглахыг шаардсан юм.
12-р сарын 20-нд, ХКН-ын зүгээс коммунист залуучуудын эвлэлийн төв хороогоор дамжуулан "Японы түрэмгийлэлтэй тэмцэн эх орноо аврах асуудлаар бүх оюутан сурагчид, олон салбарын ахан дүү нарт өгөх тунхаг бичиг" нийтлэн, оюутан сурагчдыг ажилчин, тариачидтай холбоолон, Японы түрэмгийлэлтэй тэмцэн эх орноо аврах хөдөлгөөнийг өргөтгөж, ажилчид, тариачид, арилжаачид, цэрэг армитай нэгдэхийг уриалсан юм. 12-р сарын 26-ны өдөр, Бэйпин, Тяньжиний оюутан сурагчдын холбоо байгуулагдсаны дараа, өмнөд нутагт суртал ухуулгын хэсэг томилон, Хэбэй мужийн хөдөө нутгаар ажиллуулжээ. Үүнээс хойш, Хятадын үндэстнүүдийн эрх чөлөөний төлөөх хошуучдын эгнээ байгуулагдсан юм. Шанхай зэрэг газрын оюутан сурагчид ч үйлдвэр аж ахуйн нэгж, хөдөө тосгоноор суртал ухуулга хийж эхэлжээ. Оюутан сурагчдын хөдөлгөөн ингэж ажилчин тариачдын хөдөлгөөнтэй нэгдсэнээр Японы түрэмгийлэлтэй тэмцэн, эх орноо аврах хөдөлгөөнийг хурдтай ахиулж чадсан юм.
12-р сарын 9-ний хөдөлгөөн бол нийт иргэдийг дайчлан Японы түрэмгийлэлтэй тэмцсэн хөдөлгөөн юм. Үүний ачаар Японы түрэмгийллийн эсрэг дайны үзэл баримтлал бүрэлдэн тогтож, хүн зоны үзэл бодлыг нэгтгэж, боловсон хүчнээ бэлтгэж чадсан юм.
Өдөр дутмын 
