Хятадын 2010 оны Шанхайн EXPO яармагийн тухай

     Хятадын 2010 оны Шанхайн EXPO яармаг бол 41-р удаагийн Дэлхийн EXPO яармаг юм. Мөн ч Хятад улсын зохион байгуулж буй анх дахь EXPO яармаг болно. Сайхан хот, сайхан амьдрал сэдэвтэй тус яармагт нийт 45 тэрбум юаний хөрөнгө оруулсан байна.

     1999 онд Хятадын засгийн газар 2010 оны Дэлхийн яармагийг зохион байгуулах эрхийн төлөө өргөдөл дэвшүүлэхээ албан ёсоор мэдэгдэж, 2001 оны 5-р сард Олон улсын үзэсгэлэнгийн комисст зохион байгуулах өргөдлөө өгч, 2002 онд зохион байгуулах өргөдөл тайланг дэвшүүлж байсан юм. 2002 оны 12-р сард Олон улсын үзэсгэлэнгийн комиссын шийдвэрээр Хятад улс 2010 оны EXPO яармагийг зохион байгуулах эрхийг авсан юм. Тус удаагийн Яармагийг зохион байгуулах бэлтгэл ажилд Хятад улс арваад жилийн бэлтгэлийг хийлээ.

     Шанхайн EXPO Яармагийн үзэсгэлэнгийн районыг Наньпу гүүр болон Лупу гүүрийн дэргэд, хотоор урсан өнгөрч байдаг Хуанпу мөрний хоёр хөвөөгөөр барьж байгуулсан болно. Үзэсгэлэнгийн районы нийт талбай нь 5.28 хавтгай дөрвөлжин км, үүнд мөрний зүүн хэсэг дэх нь 3.93 дөрвөлжин км, баруун хэсэг дэх нь 1.35 дөрвөлжин км.

     Тус удаагийн EXPO Яармаг Сайхан хот сайхан амьдрал гэдэг гол сэдэвтэйгээс гадна бас Хотын олон тал соёл иргэншлийг харилцан уялдуулах, Хотын эдийн засгийн хөгжил, Хотын шинжлэх ухаан техникийн шинэчлэл, Хотын орон сууцын дүүргийн шинэ дүр төрх, Хот болон хөдөө тосгоны харилцаа зэрэг таван зүйлийн дэд сэдэвтэй байгаа юм.

     21-р зуун бол хотын хөгжлийн чухал үе шат байж, 2010 оны байдлаар дэлхийн нийт хүн амын 55% хувь нь хотод төвлөрөн амьдарч байна. Иймээс хотын амьдралын ирээдүйн төлөв байдал, чиг хандлага нь дэлхийн чанартай сэдэв болж байгаа бөгөөд хөгжлийн хир төвшнөөр адил бус аль ч улс орон болон ард иргэдтэй бүгдэд нь холбоотой юм. Анх удаагаа "Хот"-оор гол сэдэв болгосон дэлхийн яармагийн хувьд Шанхайн EXPO яармагийн 184 хоногийн үзэсгэлэнгийн хугацаанд дэлхийн олон орны засгийн газар, ард иргэд "Сайхан хот, сайхан амьдрал" гол сэдвийн хүрээнд хотын хөгжлийн ололт амжилтыг бүрэн гүйцэд илэрхийлж, хотын хөгжлийн арга туршлагаа солилцон, давшингуй ойлголт танилтаа дэлгэрүүлж, шинэ зуун дахь хүн төрөлхтний орон сууц, амьдрал, ажил төрлийн талаар шинэ хэлбэр загвар сүвэгчилж, экологийн тэнцвэртэй байдал, эвсэг зохицонгуй нийгмийг бүтээн байгуулах ба тогтвортой хөгжихөд баримт жишээ хуримтлуулах болно.

     2010 Шанхайн EXPO Яармагт 192 улс орон, олон улсын 50 гаруй байгууллага оролцож байна.

     Африк тивээс: Алжир, Бурунди, Того, Эритрей, Уганда, Танзани, Мозамбик, Чад, Конго, Төв Африкийн бүгд найрамдах улс, Ангол, Мауритус, Египет, Зимбабве, Марокко, Өмнөд Африк, Ботсвана, Кот дИвуар, Намиби зэрэг 51 улс орон буюу олон улсын байгууллага оролцож байна.

     Америк тивээс: Куб, Канад, Доминик, Боливиа, АНУ, Кострика, Экватор, Аргентин, Уругвай, Чили, Перу, Гайт, Ямайк, Мексик, Бразил, Гондурас, Панам, Колумб, Парагвай, Барбадос зэрэг 35 улс орон буюу олон улсын байгууллага оролцож байна.

     Европ тивээс: Франц, Голланд, Монако, Швейцар, Украин, Итали, Испани, Герман, Турк, Грек, Португали, Орос, Азербайжан, Чех, Финланд, Серби, Люксенбург, Польш, Армен зэрэг 47 улс орон буюу бүс нутгийн олон улсын байгууллага оролцож байна.

     Ази тивээс: Монгол, Пакистан, Балба, Тажикстан, Узбекистан, Саудын Араб, Палестин, Энэтхэг, Ирак, Иран, Катар, Кувейт, Афганистан, Бангладеш, БНАСАУ, Тайланд, Япон зэрэг 44 улс орон, олон улсын байгууллага оролцож байна.

     Их далайн тивээс: Шинэ-зиланд, Австрали, Вануату, Соломон арлууд, Кирибати, Тувалу, Микронесиа зэрэг 16 улс орон буюу бүс нутгийн олон улсын байгууллага оролцож байна.

     Үүнээс гадна: НҮБ-ын Ургамалын олон төрөлт шинжийн нийтийн гэрээний холбоо, Дэлхийн эх байгалийн сан, Номхон далайн аралт орнуудын форм, Дэлхийн Эрүүл мэндийн байгууллага, Дэлхийн банк, Дэлхийн аялал жуулчлалын холбоо, Арабын нэгдсэн орнуудын холбоо, НҮБ-ын хүүдийн сан, Дэлхийн усан ашиглалтын комисс, ОУАЭХА, Олон улсын оюуны өмчийн эрхийг хамгаалах байгууллага, ДХБ, ШХАБ, Олон улсын музейн нийгэмлэг, Карибын хамтын цогц, Олон улсын тэнгисийн үйл хэрэг хариуцсан байгууллага зэрэг 50 гаруй олон улсын болон бүс нутгийн байгууллага нэгж оролцож байна.

     Шанхайн EXPO яармагийн үзэсгэлэнгийн районыг нийт ABCED гэж таван хэсэгт хувааж байна.

     A хэсэгт нь: Хятадын үндэсний ордон, Өмнөд Азийнхаас бусад Ази тивийн улс орнуудын орднууд байна.

     B хэсэгт нь: Гол сэдэвт ордон, Өмнөд Азийн болон Их далайн тивийн орнууд, Олон улсын байгууллагын ордон, бас олон нийтийн үйл ажиллагааны төв, тоглолтын төв зэрэг байна.

     C хэсэгт нь: Европ тив, Латин Америкийн болон Африкийн орнуудын ордон байна.

     D хэсэгт нь: Зарим аж ахуйн нэгжийн ордон

     E хэсэгт нь: зарим аж ахуйн ордон, Хотын соёл иргэншлийн төв болон Хотын шилдэг бүтээн байгуулалтыг цомхтгосон үзэсгэлэн зэрэг багтаж байна.