Сонсогч Энхбаатарын Үржинхандын бидэнд ирүүлсэн шүлгүүд

       Та бүхэнд сонсогч Энхбаатарын Үржинхандын бидэнд ирүүлсэн гурван шүлгээс сонирхуулья.

                                             Бодлын хурд
                              Сар хавиргантан хурц үзүүр нь
                              Илдийн ир мэт ганжиртаж
                              Салхин хүлэгт зайдан мордоод
                              Илбийн юм шиг давхихад
                              Санаа болоод хараа хүрэмгүй алсад 
                              Итгэлийн дуунаар очоод
                              Сав ертөнцөөс анги орших
                              Бодлын далайд шингэнэ ээ
                              Уясан мэлмэрэх далайн хөвөө нь 
                              Болор эрдэнэ мэт туяарч
                              Усан завинд сэлүүргүй суугаад
                              Бороо мэт урсахдаа 
                              Ухаан болоод ул хүрэхгүй газар 
                              Бодлын хурдаар зочлоод
                              Уудам орчлонгоос анги орших
                              Мөрөөдлийн оронд очно оо
                              Наран эрхлэх урт цацраг нь
                              Шижир алт мэт гялалзаж
                              Намуун эгшигт цуваанд дайгдаад 
                             Жигүүртэй юм шиг дэвэхүйд
                             Нас болоод бие гүйцэхгүй алсад
                             Сэтгэлийн дуудлагаар хүрээд
                             Навчит хорвоогоос анги орших
                              Бодлын алсад уусна аа.
                              *** *** ***

                                 Би өөртөө үнэнч үлдэнэ 

                           Амттай үгээр намайг аргадсан ч
                           Аашных нь сайханд сэтгэл уярсан ч
                           Анх дурласан түүнийгээ л гэж
                           Ариун хайрандаа үнэнч үлдэнэ би

                           Өнгөний нь сайханд нүд гялбасан ч
                           Үнэрийх нь сайханд сэтгэл татагдсан ч
                           Өрөөлийн газар идээшихийг би хүсэхгүй
                           Өргөө нутагтаа уулс шигээ үнэнч үлдэнэ би 

                           Бусдын магтаалд салхи мэт хөөрөлгүй
                           Буруутгасан бүхэнд өд мэт унахгүй
                           Балмад үгсээр зэвсэг хийн дайрсан ч
                           Би тэнгэр мэт өөрөө өөртөө үнэнч үлдэнэ 
                            *** *** ***

                                     Чөлөөт сэтгэлгээний мөртүүд
                           Чөлөөт сэтгэлгээний мөртүүд тархин чинад эгшиглэнэ 
                           Чиний зүгээс дотно харц над руу урсана
                           Чимээгүй хийгээд чих дөжрөм дуунд сүлэлдэн амьдарч
                           Чимэгт үгсийг холбон ертөнцийн тухай бодлогширном

                           Яруу найраг, аз жаргалын тухай
                           Ялдамхан учрал, гэгээн мөчүүдийн тухай
                            Зовлон шаналал, үзэн ядалтын тухай
                            Зоргоороо шүлэглэж дураараа бүжнэм

                            Сэтгэлийн нууцад долгиолох нандин хайрын давалгаа
                            Сэм сэмхэн урсах цагийн эрхэнд номхорно
                            Сэрэмж алдсан үед эхийн хайрыг биширч
                            Сэтгэлгээний гүн ертөнцөд ухаан жолоогүй тэмүүлнэ