Найдангийн Түвшинбаярт илгээсэн баярын захиа

    8-р сарын 14-ний өдөр, Бээжингийн олимпийн наадмын жүдо бөхийн эрэгтэйчүүдийн -100 кг-д хүч үзсэн жүдо бөхийн олон улсын хэмжээний мастер Найдангийн Түвшинбаяр Бээжингийн олимпийн наадамд урамтай сайхан барилдаж, эх орондоо олимпийн аваргын анхны алтан медалийг авчирсан юм. Тэрээр алтан медаль авах үеийнхээ сэтгэгдлийг ярихдаа, "Энэ бол зөвхөн миний л амжилт биш, бүх хамт олны минь, Монголын ард түмний минь хүсэн хүлээж байсан медаль юм, би тэр сайхан нутагт төрж өссөн Монголынхоо ард түмэн, бүх хүмүүсээрээ бахархаж байна, төрүүлж өсгөсөн аав ээж, найз нөхөд, хамт бэлтгэл сургууль хийж байсан багийн хамт олондоо баярлаж байна" гэж сэтгэл догдлон хэлж байсан.

    Шагнал гардуулах хамгийн өндөр тавцнаа олимпийн алтан медалийг энгэртээ гялалзуулан зогсох үед талбайд нь байсан бүх монгол үзэгч тэрчлэн зурагтаа хараад сууж байсан бүхийл монголчууд баярын далайд шумбаж байсан юм. Бээжингийн олимпийн наадмын эрэгтэйчүүдийн -100 кг-ийн тэмцээнийг газар дээр нь үзсэн Монгол улсын Ховд аймгийн үзэгч Батсайхан бидэнд ярилцлага өгөхдөө баярласан сэтгэлээ дарж ядан байлаа. Тэрээр хэлэхдээ,

    "Би гэр бүлийнхэнтэйгээ хамт Бээжинд олимпийн наадам үзэхээр ирсэн, монголчуудын маань заяа тэнгэрлэг байна, Түвшинбаяр гэдэг залуу олимпийн алтан медаль авснаар, монголчууд маань улам их эв нэгдэлтэй, улам сайхан явах болбуу гэж бодож байна, би үнэхээр хэлэх үгээ олж ядаж байна, медаль гардуулах тэрхүү агшаа уйлсан, хашхиралдсан, инээсэн, баярлан улс дүүрэн байсан, үнэхээр их баярлаж байна." гэж яах аргагүй догдолсон сэтгэлээр ярьж байлаа.

    Өвөр Монголын Улаанхад хотын Ар Хорчин хошууны Сайхантал сумны малчин Зүрхийн Эрдэнэ, Монгол улс олимпийн анхны алтан медалийг авсан сайхан чимээг дуулаад сэтгэл хөдлөхдөө Найдангийн Түвшинбаярт зориулж, "Монгол хүүгийн яруу алдар" гэсэн шүлэг бичиж ирүүлсэн юм.

                                Монгол хүүгийн яруу алдар

                         Найман сарын Бээжингийн тэнгэрт
                         Найртай амьсгал бялхам байлаа
                         Найргүй ширүүн тамирын мөрийцөөнд
                         Найдангийн төвшинбаяр манлай авлаа
                         Хөх тэнгэртэй монгол нутаг
                         Хөрст дэлхийд өндөрлөж үзэгдлээ
                         Хүдэр дүртэй монгол хүү
                         Хүндтэй тавцанд ханайж зогслоо.
                         Соёмбо үсэгтэй нэгэн далбаа
                         Сугарч дээшээ мандаж байлаа
                         Судас нэгтэй уул хайрхан
                         Сонор сайхан цууриа өргөлөө
                         Монгол хүүгийн яруу алдар
                         Монгол улсаа өргөж дуурслаа
                         Эрийн манлай Түвшинбаяраа
                         Эрдэнэ би чамайг алсаас тэвэрье
                         Эрээс дээгүүр эр төрхийг
                         Эх газартаа даатган даатгая.