Европын Холбооны Зөвлөлийн дарга Жосе Мануел Барросо 24-ний өдөр хэлэхдээ, НҮБ-аас Ливанд түр суух хүчинд Европын Холбооны орнууд туслаж, цэргийн хүчнээ нэмэгдүүлэх төлөвлөгөөг нь биелүүлнэ гэдэгт итгэж байна гэжээ.

     Франц 2 батальон цэрэг илгээж, НҮБ-аас Ливанд түр суух хүчинд оролцож, Францаас оролцох хүчний хэмжээг 2000 хүн болгон нэмэгдүүлнэ гэж Францын Ерөнхийлөгч Жак Ширак 24-ний өдөр мэдэгджээ.

     Мөн 24-ний өдөр Италийн Гадаад хэргийн сайд Массимо Далема хэлэхдээ, Итали НҮБ-аас Ливанд түр суух хүчинд удирдлагын хариуцлага хүлээж, бас 3000 орчим цэргээ уг хүчинд оролцуулахыг амлаж байна гэлээ. Италийн Ерөнхий сайдын ажлын алба бас мөн өдөр мэдэгдэл хийж, Америкийн Ерөнхийлөгч Жорж Буш Италийн Ерөнхий сайд Романо Продитой утсаар ярихдаа, НҮБ-аас Ливанд түр суух хүчнийг Итали удирдахыг Америк дэмжинэ гэж илэрхийлсэн гэжээ.

     НҮБ-аас Ливанд түр суух хүчинд оролцохыг зөвшөөрч байгаагаа Шведын Засгийн газар ч мөн 24-ний өдөр мэдэгджээ. \О.Дарамбазар орчуулж, Сайн-Өлзий хянав.\