Солонгосын Төв цахилгаан мэдээний агентлагийн мэдээлснээс үзвэл, БНАСАУ 9-ний үдээс өмнө газар доор цөмийн туршилт хийсэн байна. Цөмийн туршилт хийлээ гэж БНАСАУ мэдэгдсэний дараа Хятад, БНСУ, Япон зэрэг холбогдох талууд байр сууриа тодорхойлж, БНАСАУ-ын цөмийн туршилт хийсэнд эсэргүүцэл илэрхийлсэн байна.

     Энэ цөмийн туршилтыг зуун хувиар өөрийн техникт түшиглэж хийсэн бөгөөд туршилт нь аюулгүй, амжилттай болж, цөмийн туршилт хийх явцад цөмийн цацраг нэвчих мэтийн аюул гараагүй гэж Солонгосын Төв цахилгаан мэдээний агентлаг мэдээлсэн байна.

     Хятадын Гадаад харилцааны яам мэдэгдэл хийж, БНАСАУ нь олон улсын хамтын нийгэмлэгийн эсэргүүцлийг үл ойшоон аймшиггүй цөмийн туршилт хийсэн байна. Үүнийг Хятадын засгийн газар эрс эсэргүүцэж байна. Цөмийн зэвсэггүй байх гэсэн амлалтаа сахиж, байдлыг цаашид муудуулах үйл ажиллагаагаа зогсоож, зургаан талын хэлэлцээний замд буцан ирэхийг Хятадын тал БНАСАУ-д хатуу шаардаж байна гэж тэмдэглсэн бөгөөд Зүүн хойт Азийн бүс нутгийн энх тайван, тогтвортой байдлыг хамгаалах нь холбогдох талуудын хамтын ашиг сонирхолд нийцнэ гэж илэрхийлсэн байна. Хятадын Гадаад харилцааны сайд Ли Жаошин мөн өдөр Америкийн Төрийн нарийн бичгийн дарга Кондолеза Райстай утсаар яриж, Солонгосын хойгийн өнөөгийн байдалд холбогдуулан санал бодлоо солилцсон байна.