Шүй бичиг бол Хятадын үндэстний цөөнхүүдийн нэг—Шүй үндэстний өвөрмөц соёлын охь содон өв болох бөгөөд одоо ч гэсэн, Шүй үндэстний хэсэг хүмүүс уг бичгийг хэрэглэсээр байна. Шүй бичиг нь Хятадын эртний яст мэлхийн хуяган дээрх бичигтэй төсөөтэй байдаг бөгөөд бас эртний Бабилоны дүрс үсэг, эртний Египетийн зураг үсэгтэй ч төсөөтэй байдаг юм. Өнө удаан жилийн түүхтэй, гүн нарийн агуулгатай Шүй бичиг бол Шүй үндэстний нэвтэрхий толь болох бөгөөд Хятадын үндэстнүүдийн түүх соёлын шилдэг өвүүдийн нэг нь юм гэж мэргэжилтэн эрдэмтэд үзэцгээж байна.

     Шүй үндэстний өвөг дээдэс нь аль эрт хэдэн мянган жилийн өмнө, эртний Шүй бичгийг зохиосон байжээ. Шүй бичиг нь зураг үсэг, дүрс үсэг, гадны гаралтай үсэг зэрэг 3 төрлийн үсгээс бүрдсэн байдаг юм. Шүй үсгийг олон жил судалсан Яо Бин-ле танилцуулж хэлэхдээ: "Шүй бичиг бол гар дамжин хуулагдаж, ам дамжин уламжлагдаж ирсэн юм. Шүй бичгээр үлдэж хоцорсон зохиол бүтээлд гүн ухаан, үндэстний зан заншил, үндэстэн, гоо зүй зэрэг талын агуулга хамрагдаж байдаг. Шүй бичиг бол соёлын маш ховор өв болж байгаа юм гэж би үзэж байна" гэжээ.

     Шүй үндэстэн 400 мянга гаруй хүн амтай бөгөөд тэд голцуу Хятадын баруун өмнөд нутгийн Гүйжөү мужийн Саньдү, Либө зэрэг сяньд амьдарч байгаа юм. Яо Бин-ле бол Либо сяньд төрж өссөн Шүй үндэстэн юм. Тэр хэлэхдээ, Хятад улсад хадгалагдаж байгаа Шүй бичгийн төрөл зүйл хэдэн арван мянгад хүрч байна. Өнөөгийн байдлаар, эрдэмтдийн нотолсон Шүй бичгийн үсгийн тоо нь 1400 гаруйд хзрсэн банйа гэжээ.