"Ажилч арвич байхыг эрхэмлэдэг" нь Хятадын үндэстнүүдийн уламжлалт сайхан хэв заншил юм. Нийгэм соёл хөгжиж баялаг сайхан амьдралтай болсон өнөөдрийн нөхцөл байдалд ч мөнгө төгрөг илүүхэн хадгалж бага зарлага гаргахыг хүмүүс чухалд үзсээр байна. Гэвч юм болгонд онцын зүйл гэж байдагтай адилаар, жил болгоны тогтсон хэсэг хугацаанд Хятад хүмүүс мөнгө төгрөг хэмнэдэг сайхан заншлаа дүр орхиж, боломжийн хирээр санааны эрхээр мөнгө төгрөг зарцуулдаг юм. Энэ нь Хятадын уламжлалт хамгийн том баяр—Цагаан сарын үе болно.

     Билгийн улирлын хуучин жилийн хамгийн сүүлчийн өдөр тухайлбал битүүний орой гэр бүлийнхнээрээ цугларч хамтаар хоол иддэг нь Хятад хүмүүсийн цагаан сараа тэмдэглэдэг уламжлалт зуршил юм. Өнгөрсөнд зонхилох хүмүүс нь гэртээ ийм хоол иддэг байсан бол, амьдралын нөхцөл байдал сайжрахын хирээр их олон хүн битүүний хоолоо том том гуанз ресторанд идэх болж байна. Ингэснээр, сүүлийн жилүүдэд цагаан сарын үеэр, Бээжин, Тяньжинь, Шанхай, Чүнчин, Гуанжөү зэрэг том том хотуудын нэртэй хоолны газрууд нь хамгийн орлого олох үед ордог байна. Шарсан нугасны нэрт хоолны газар--Чуан Жюйдэ Корпораци Компанийн холбогдох албаны хүн хатагтай Лю Гүй-фан хэлэхдээ, энэ оны цагаан сарын хугацаанд манай хоолны газрын орлого шинэ түвшин тогтоох боломжтой байна гэжээ.

     "Өнөөгийн байдлаас үзэхэд тайллагын ширээ захиалсан байдал маш сайн байна. Битүүний оройгоос шинийн долоон хүртэл бүр захиалга аваад байгаа бөгөөд хоосон өрөө гэж үлдсэнгүй. 2005 оны цагаан сарын хугацаанд манай корпорацийн Бээжин дэх салбарын орлого нь 10 сая юаниас давсан, энэ онд 2005 оныхоос давах боломжтой байна" гэж Лю Гүй-фан хэллээ.

     Хятадын дотоодын гуанз ресторанууд цагаан сард зориулан идэвхтэй ажиллаж байгаа төдийгүй, Хятадад хөрөнгө оруулан ажиллуулж байгаа гадаадын түргэн үйлчилгээний хоолны газрууд тухайлбал Mcdonalds, KFC, Wel-mart, Carrefour зэрэг хоолны газар, супер маркетууд ч төрөл бүрийн арга хэмжээ зохион явуулж, хэрэглэгчдийн сонирхлыг татаж байна.