Н.Сайн-Цогтын багын нэр нь Заг-Пүрэв. 1914 оны 2-р сарын 23-ны өдөр Цахарын чуулганы Гөл хөх хошууны 2-р сум даруй одоогийн Шилийн гол аймгийн Шулуун хөх хошууны Загастай сумд ядуу малчины гэрт төржээ. Н.Сайн-Цогт 15 нас хүртэл аав ээжээ хавсарч мал дээр байжээ. 15 настайдаа Гөл хөх хошууны Нартын сургуульд бичиг үзээд хожим нь Хайрхан энгэрийн бага сургуульд шилжин суралцажээ. Н.Сайн-Цогт 23 настайдаа Жан Бэй шянь дах Цахарын монгол залуусын сургуульд орж суралцав. Мөн жилийн сүүлчээр тэрээр Японд очиж суралцахаар болж, 1937 онд Японы Токио хотод хүрч, "Нөхөрсөг хөршийн нийгэмлэг"-д нэг жил япон хэл сурчээ. Дараа нь Дорнод Азийн их сургуулийн сурган хүмүүжлийн салбарт орж 4 жил суралцасан байна. Японд суралцаж байх хугацаандаа Н.Сайн-Цогт "Сэтгэлийн хань" хэмээх шүлгийн түүвэр ба "Элс манхны эх нутаг" хэмээх өдрийн тэмдэглэл хэлбэртэй найруулалын зохиолыг бичиж хэвлүүлсэн байна. 1942 оны эхээр тэрээр улсдаа буцаж, Баруун сөнөд хошууны охидын сургуульд багшилжээ.