Чингисийн онгоны 2 дугаар хэсэг бол Чингис хааны дурсгалын цогцолбор нэртэй цогцолбор музей юм. Энэ шинэ цогцолбор цэвэр жуулчдад зориулагджээ. Онгоны тахилгатай ордон луу ороход 80 юань төлдөг бол энэ цогцолборыг үзэхэд 90 юань төлнө. Хаалгаар нь оруут газарт морины туурайн хэлбэртэй гантиг чулуун талбай дээр Монголын эзэнт гүрний газрын зургийг дүрслэн Бээжин, Хар хорум зэрэг нийслэл хотуудыг бусад эзэмшлийн хотуудаас арай том чулуун самбараар тэмдэглэжээ. Газрын зургийн 4 талд шаттай өндөрлөсөн чулуун индэр байрлана. Түүн дээр гарч харвал Эзэнт гүрний газрын зураг улам сүртэй харагдах юм билээ. Газрын зургийг өнгөрөөд хөндий дүүрэн, айсуй яваа нүүдэл таарна. Хорин хоёр хүрэн бух хааны Алтан өргөөг чирч явна. Хааны өргөөний араар хатдын бага гэрүүд хүрээлж, эргэн тойронд нь морьтой баатрууд хуяг дуулгаа агсан дагалджээ. Хонь, ямаа, саалийн үнээ, араг үүрч аргал түүж яваа бүсгүй, хоньчин хүү гээд их нүүдлийг дагасан нүсэр цуваа үргэлжилнэ. Сүрлэг дүрсэлжээ. Бүгдийг нь ширэм, гантөмрийн хайлшаар цутгаж хийжээ. Бас морьт баатруудын дүрийг нэгийг ч давтаагүй гэнэлээ. Хааны алтан гэрт жуулчид монгол хувцас өмсөн хүсвэл хааны олбогыг түшин сууж зургаа авахуулж болох юм билээ. Их нүүдлийг өнгөрүүлээд монгол бичгээр Хаган гэсэн хэлбэртэй байшинд Монгол үндэстний түүх соёлын музей байрлана. Музейн үзмэр нь их биш юм, бүрэн цуглуулж дуусаагүй ч байж магад. Харин компьютерээр түүхэн сэдэвт кино, монгол соёл, түүхтэй холбоотой видео бичлэгүүд байрлуулсан нь сонирхолтой болжээ. Цогцолбор баруун зүүн 2 том хаалгатай. Боржин чулуун эдгээр хаалга нь мөн л их сүр хүчний билгэдэл гэнээ. Цогцолборын дотуур аялалын жижиг тэрэгнүүд үйлчлэх юм. Үүгээр Чингисийн онгон хүрсэн аялал маань үндсэндээ өндөрлөж өглөө эртийн нарнаар Бээжин хотыг зорин хөдөллөө.