Мөн хагас хэвтээгээр амарч буй бурханы дүрийг залсан Вофо Си хийдийг зорьсон улс ч энэ хүрээлэнд ирдэг. Зам талбай, явган хүний зам, үндэсний хэв шинжийг тусган барьсан саравчууд, цайны газрууд нь цэцэгсийн хүрээлэнгүүд шигээ цэвэрхэн, цэгцтэй. Цэвэр агаар хайн ургамлын хүрээлэнгээ зорьсон Бээжингийнхний зам тасардаггүйн адил цэцэрлэгээ тордон амилуулдаг цэцэрлэгчдийн ажил ч амсхийх завгүй үргэлжилдэг байх. Түүнээс гадна энэ зун Бээжин хотод зуны Олимпийн наадам болно. Бээжин хот дэлхийн анхаарлын төвд байна гэсэн үг.