Эрхэм анд нөхдөө
Шинэ оны анхны наран алтан дэлхийг гийгүүлэн мандлаа. Мэргэжил нэгт анд нөхөд, үзэгч, сонсогч, уншигч та бүхэндээ Бээжин хотоос шинэ оны мэнд дэвшүүлж байна. Морилон ирж буй бар жилдээ амжилт бүтээлийн олзтой, эрч хүч дүүрэн байхыг хүсэн ерөөе!
Улирч буй 2021 он бидний хувьд түүхэн жил байлаа. Хятадын Коммунист намын 100 жилийн ой тохиов. Нэгэн зууны өмнө 50 гаруй гишүүнтэй байгуулагдаж байсан ХКН эдүгээ 90 сая гаруй гишүүнтэй болон өргөжиж, ард түмнээ удирдан чиглүүлж Хятадын гайхамшгийг бүтээжээ.
Шинэ эрин үед Ши Жиньпин даргын удирдлага дор 1 тэрбум 400 сая хүн амтай Хятад улс чинээлэг нийгмийг бүх талаар бүтээн байгууллаа. Чухам энэ цаг үед Хятадын үндэстнүүдийг хэдэн мянган жил зовоосон туйлын ядуу байдлаас эгнэгт ангижирсан юм.
Их эрин үеийг гэрчилж, шинэ түүхийг бодит шударгаар тэмдэглэн үлдээгчийн хувьд улирч буй онд Хятадын Төв Радио Телевиз "Шинэ ертөнц", "Ядуурлаас ангижруулахуй", "Чинээлэг нийгэм" зэрэг олон шилдэг бүтээл туурвиж, ХКН болон Хятадын ард түмний тэмцэл, хөгжил, дэвшлийг түүхчлэн үлдээж, зуун жилийн турш бэхжиж хат суусан ХКН-ын дотоод хүчийг Олон улсын хамтын нийгэмлэгт танилцуулав.
Хятадын ард түмний гадаадад зориулсан радио нэвтрүүлгээ цацаж эхэлсний 80 жилийн ой сарын өмнө тохиож, түүхэн ойн үеэр Ши Жиньпин дарга Төв Радио Телевизэд баярын захидал илгээсэн билээ. Баярын захидалд “Хятадын хөгжлийг ард олонд таниулж, Хятадын дуу хоолойг тод уламжилж, олон улсын нэр нөлөө бүхий шинэ хэлбэрийн хэвлэл мэдээллийн хэрэгсэл бий болгох”-ыг заавар болгожээ. Бид энэ зорилгын төлөө хичээнгүй ажиллах болно.
Зовлон амсаж байж ихийг бүтээнэ. Энэ бол Хятадын эртний мэргэдийн үг. Эдүгээ цар тахлын уршигаар дэлхий ертөнц тайван бус байна. Гэвч энэ хүнд цаг үед ч гэсэн энх тайвны төлөө, хөгжлийн төлөө, аз жаргалын төлөөх хүмүүсийн хүсэл тэмүүлэл зогсоогүй юм.
Хятадын Төв Радио Телевизээс бэлтгэсэн "Хятадын түүхэн үйл явдлууд", "Сонгодог уран зохиолоос Хятадыг ойлгох нь", "Хятадын газар нутгийн чуулган" зэрэг бүтээлээрээ бид Хятад улсын өнө эртний түүх соёл, хүн ардын амар амгалан амьдралыг харуулав. "Үндэсний цэцэрлэгт хүрээлэн", "Урлагийн олимп" нэвтрүүлгээрээ бид шинэ эриний "Үзэсгэлэнт Хятад орон", "Эрүүл энх Хятад орон"-оо танилцуулав. Тэрчлэн “Хятадын сансрын станц”-аас шууд дамжуулсан "Сансрын хичээл" нэвтрүүлэг маань орчлон ертөнцийн нууцыг эрэлхийлэх олон залуусын хүсэл мөрөөдлийг бадраав.
Юньнань мужид хагас жил гаруйн хугацаанд нүүдэллэсэн 16 зааны аялал, замын зураглалыг CGTN, Ян Шипинь, CCTV NEWS мэдээний шинэ хэрэгслүүд зураглаж, сурвалжилж, нийтдээ 7000 цагийн шууд видео контент цацаж, сошиал ертөнцийг шуугиуллаа.
Дэлхийн дахинд хэвлэл мэдээллийн үндсэн зарчим нь үнэн бодит баримтад үндэслэдэг. Баримт, дахин баримт гэдэг зарчим бол мөн л бидний баримталдаг зүйл билээ. Бид 2021 онд шударга ёсыг баримтлан шаргуу ажилласаар ирэв. "Цар тахалтай тэмцсэн дэлхийн жагсаалт" гэх хуурамч тайлангийн эсрэг үнэнийг тодруулах, зөв бурууг ялгах зорилгоор "Дэлхийн сүлжээ хэрэглэгчдийн олон нийтийн санал асуулга"-ыг гурван үе шаттай зохион байгуулж, гадаадын олон зуун сая интернет хэрэглэгчдийн дэмжлэг олсон юм.
Афганистаны нөхцөл байдлын талаар манай сурвалжлагч тухайн газраас дамжуулсан мэдээллүүд дэлхийн олон хэвлэл мэдээллийн чухал эх сурвалж боллоо. Шууд дамжуулсан мэдээлэл нь зарим улс Афганистанд дур зоргоор хүч хэрэглэж, гэмгүй номхон иргэдийн амь насыг хохироож буй балмад үйлдлийг илчилсэн юм.
Цаашид бид хэвлэл мэдээллийн хариуцлагатай, мэргэжлийн стандартыг баримталж, үнэний төлөө идэвхтэй ажиллах болно. Мэргэжлийн нэр хүндээ хамтдаа эрхэмлэж, бодит байдлыг гуйвуулан улс төрийн ашиг хонжоо олох гэсэн санаархлыг таслан зогсоож, арьс өнгөөр ялгаварлан гадуурхахыг үл тэвчиж, үзэл суртлын буруу ойлголтыг залруулж, бодитой, шударга, идэвхтэй, олон улсын эерэг, дулаан харилцааг бий болгохын төлөө хамтдаа зүтгэхийг барууны түншүүддээ уриалж байна.
Хүсэл зорилго нэгтэй хүмүүсийг уулс ч тэр, далай ч тэр зааглахгүй. Өнгөрсөн нэг жилд Хятадын Төв Радио Телевизийн найз нөхөд хүрээгээ тэлсэн байна. Бид олон улсын хэвлэл мэдээллийн салбарууд, харилцагч, хамтрагч хүмүүстэй 600 гаруй захидал солилцож, 20 гаруй удаа цахим болон биечилсэн уулзалт хийлээ.
Бид хэвлэл мэдээллийн түншлэлийн олон талыг хамарсан, эрх тэгш, харилцан итгэлцсэн хамтын ажиллагааны механизм хөгжүүлж, ил тод нээлттэй харилцаж “Итгэлцлийн гүүр” тавихаар зорьж байгаа энэ үед та бүхний сэтгэл шингэсэн найрсаг захидлууд биднийг илүү сайн ажиллах урам зориг өгч байна. Итгэл хүлээлгэсэн та бүхэндээ баярлалаа!
Энэ цаг үед техник технологийн талаасаа боломжгүй зүйл, үл гүйцэлдэх зүйл гэж үгүй болжээ. Бид ямар ч нөхцөл байдалд бэлэн ажиллах шинэ хэвлэл мэдээллийг өсгөж, бэхжүүлж байна. Энэ зун Хятадын Төв Радио Телевиз дэлхийд анхны 4K хэт өндөр нарийвчлалтай сувгаар Токиогийн олимпын уралдаан тэмцээнийг тухайн газраас амжилттай шууд дамжуулав. Бид дэлхийн анхны 4K хэт өндөр нарийвчлалтай олимпын сувгийг ажиллуулснаас хойш гурван сарын хугацаанд 400 сая гаруй үзэгчтэй болсон байна. Ганцхан сарын дараа Хятадын уламжлалт билгийн тооллын бар жилийн сар шинийн баяр эхэлнэ. Энэ үеэр Бээжин хотноо олимпын ариун галыг дахин асаах болно. Хятадын Төв Радио Телевиз "5G+4K/8K+AI" техникийн дэмжлэгтэйгээр Бээжин-Жанчхүү хооронд хурдны галт тэргэнд шууд нэвтрүүлгийн вагон ажиллуулж, өвлийн олимпыг дамжуулна. Дэлхийн хэмжээнд анх удаа хурдны галт тэргэнд дүрс бичлэгийн өндөр нарийвчлалтай технологийн асуудлыг шийдвэрлэж буй нь энэ юм. Бид дэлхийн өнцөг булан бүрээс ирсэн та бүхний хамт гайхамшигтай, ер бусын Бээжингийн өвлийн олимпыг дэлхий нийтэд хүргэхийг урьж байна.
Хөх уулнаа бар архирах нь мянган газарт сүртэй. Хүмүүний орчлонд хавар эргэж түмэн газар ээлтэй. Ирж буй шинэ онд Хятадын Коммунист намын 20 дугаар их хурал болж, Хятадын ирээдүйн хөгжлийн төлөвлөгөөг зураглах болно. Бид илүү хичээн зүтгэж , нягт нямбай ажиллаж, улам олон шилдэг бүтээл бэлтгэж, шинэ эриний Хятад улсыг дэлхийн дахинд олон талаас нь таниулж, хүн төрөлхтний хувь заяаны нэгдмэл цогцыг байгуулахад хувь нэмэр оруулахад бэлэн байна.
Та бүхэнд дахин сайн сайхныг хүсье. Даян дэлхий амар амгалан байх болтугай.
