Хятад улсын дарга Ши Жиньпин Бангкокт Японы ерөнхий сайд Фумио Кишидатай уулзав.
Ши Жиньпин хэлэхдээ, "Энэ жил Хятад Япон харилцаагаа хэвийн болгосны 50 жилийн ойгоо хамтран тэмдэглэлээ. 50 жилийн хугацаанд хоёр тал улс төрийн дөрвөн баримт бичиг болон бусад иж бүрэн чухал нийтлэг ойлголтыг тохиролцож, олон салбарын харилцаа хамтын ажиллагаа баялаг үр дүнд хүрч, хоёр орны ард түмэнд чухал ашиг тусыг бүтээн, бүс нутгийн энх тайван, хөгжил цэцэглэлтийг нэмэгдүүлсэн юм. Хятад Япон бол ойр хөрш, Азийн, дэлхийн чухал орнууд бөгөөд олон нийтлэг ашиг сонирхолтой, хамтын ажиллагааны томоохон орон зайтай. Хятад Японы харилцааны чухал шинж чанар өөрчлөгдөөгүй, өөрчлөгдөх ч үгүй. Японы талтай хамтдаа стратегийн үүднээс хоёр орны харилцааны ерөнхий чиг хандлагыг сайтар тогтоож, цаг үеийн шаардлагад нийцсэн Хятад Японы харилцааг цаашид өргөжүүлэн хөгжүүлэхэп Хятадын тал бэлэн байна" гэв.
Хоёр тал харилцан чин үнэнчээр хандаж, итгэлтэй харилцан, Хятад Японы улс төрийн дөрвөн баримт бичгийн зарчмыг баримтлан сахиж, түүхийн туршлагыг дүгнэн сургамж авч, бие биенийхээ хөгжлийг бодитой, зөв талаас нь харж, “Харилцан нөгөө талынхаа хамтын ажиллагааны түнш нь байх, харилцан нөгөө талдаа аюул заналхийлэл учруулахгүй байх” улс төрийн нийтлэг ойлголтыг бодлогодоо тусгах ёстой. Түүхийн, Тайваний зэрэг зарчмын чанартай чухал асуудлууд хоёр орны улс төрийн үндэс суурь, итгэл үнэмшилд холбогдох тул заавал амлалтаа сахиж, эв зүйтэй шийдвэрлэх хэрэгтэй. Хятад улс бусад орны дотоод засаглалд хуруу дүрэхгүй, хэн хүн ямарваа шалтгаар Хятад улсын дотоод хэрэгт хөндлөнгөөс оролцохыг мөн хүлээн зөвшөөрөхгүй гэж Ши Жиньпин онцлов.
Ши Жиньпин хэлсэн үгэндээ: "Хятад Япон хоёр орны нийгмийн тогтолцоо, улс орны байдал өөр өөр, хоёр тал харилцан хүндэтгэж, итгэлцлээ нэмэгдүүлэн сөрөг таамаглалаа арилгах ёстой. Далай тэнгис, нутаг дэвсгэрийн маргаантай асуудал дээр өмнө нь нэгэнт тохиролцсон зарчим ба нийтлэг ойлголтыг сахин мөрдөж, улс төрийн оюун ухаан ба хариуцлагатай байр сууриар санал зөрөлдөөнийг эв зүйтэй тогтоон барих хэрэгтэй. Газарзүйн хувьд ижил төстэй, хүмүүнлэгийн соёл харилцан уялдаатай байдаг өвөрмөц давуу талаа цаашид ч сайтар ашиглаж, засгийн газар, улс төрийн нам, парламент, орон нутаг зэрэг олон сувгаар харилцаа солилцоо өрнүүлж, ялангуяа алс ирээдүйг харж, хүүхэд залуучуудын солилцоог идэвхтэй зохион байгуулж, харилцан бие биеийнхээ талаар бодит, эерэг танин мэдэхүйтэй болж, ард иргэдийн харилцааг нэмэгдүүлэх ёстой" гэв.
Ши Жиньпин хэлэхдээ: "Хоёр орны эдийн засаг маш их харилцан шүтэлцээтэй. Дижитал эдийн засаг, ногоон хөгжил, банк санхүү, эмчилгээ болон өндөр настны асрамж, үйлдвэрлэлийн болон нийлүүлэлтийн гинжин хэлхээний тогтвортой байдлыг хамгаалах талаар яриа хэлцэл хамтын ажиллагаагаа эрчимжүүлж, өндөр түвшинд давуу талаараа харилцан нөхөж, харилцан ашигтай хамтаар хожих ёстой. Хоёр орон өөр өөрсдийн алс ирээдүйн ашиг сонирхол хийгээд бүс нутгийн хамтын ашиг сонирхлоор гараа болгож, стратегийн бие даасан байдал, найрсаг хөршийн сайн харилцааг баримталж, зөрчил мөргөлдөөнийг эсэргүүцэн, олон талт үзлийг сайтар хэрэгжүүлж, бүс нутгийн интеграцичлалын үйл явцыг нэмэгдүүлж, Ази тивийг хамтдаа хөгжүүлэн бүтээн байгуулж, дэлхийн сорилтуудыг зохицуулах ёстой" гэв.
Фумио Кишида хэлэхдээ: "Ноднингийн 10-р сард бид утсаар холбогдон ярилцаж, шинэ эриний шаардлагад нийцсэн Япон Хятадын харилцааг хөгжүүлэхэд санал нэгдсэн билээ. Эдүгээ хоёр орны олон салбарын харилцаа хамтын ажиллагаа алхам алхмаар сэргэж байна. Япон Хятад бол ойр хөрш, харилцан бие биедээ аюул заналхийлэл учруулахгүй, энх тайвнаар зэрэгцэн орших шаардлагатай, ингэх ч ёстой. Японы хөгжил цэцэглэлт Хятад улсаас салангид орших боломжгүй, Хятад улсын хувьд ч эгээ адилхан. Хятад улс өөрийн хөгжлөөр дэлхий нийтэд эерэг хувь нэмрээ оруулахыг Японы тал сайшааж байна. Япон Хятадын хамтын ажиллагаа асар их боломжтой, бүс нутаг хийгээд дэлхийн хөгжил цэцэглэлтэд хоёр орон чухал үүрэг хариуцлага хүлээж байна. Япон Хятадын харилцааг эрүүл, тогтвортой хөгжүүлэхийн тулд Хятадын талтай хамтран зүтгэхэд Японы тал бэлэн байна. Тайваний асуудал дээр, Японы талаас Япон Хятадын хамтарсан мэдэгдэлд дурдсан амлалт өчүүхэн ч өөрчлөгдөөгүй. Хятадын талтай яриа хэлцэл харилцаа холбоогоо зузаатгаж, Япон Хятадын харилцааны зөв чиглэлийг хамтдаа удирдан дагуулахад миний бие бэлэн байна" гэжээ.
Өндөр зиндааны харилцаа, яриа хэлцлээ хадгалж, улс төрийн итгэлцлээ нэмэгдүүлэн ажил хэрэгч хамтын ажиллагаагаа ахиулж, хүмүүнлэгийн солилцоогоо өргөтгөн, олон улсын, бүс нутгийн үйл хэрэг дэх зохицуулалт хамтын ажиллагаагаа эрчимжүүлж, шинэ эриний шаардлагад нийцсэн тогтвортой, бүтээлч Хятад Японы харилцааг өргөжүүлэн хөгжүүлэхийн тулд хамтдаа хичээн чармайхыг хоёр тал санал нэгтэй зөвшөөрчээ.
\Уртнасан\
