Каннын кино наадмын үеэр 6 дахь үеийн ид уран бүтээлчид Stanley Kwan, Hark Tsui, Wong Kar-wai, Ann Hui нар өөрсдийн шинэ онд хийх бүтээлүүдийнхээ талаар нийтэд танилцууллаа. Сүүлийн жилүүдэд хятадын киночдын бүтээл олон улсын хэмжээний олон том шагналуудыг хүртэж дэлхийн түвшинд хүрснээ чанга дуугаар зарлаад байгаа. Берлиний Алтан баавгай, Америкийн алдарт Оскар, Канн-ы Дал модны алтан мөчир гээд олон том шагналыг энд дурдаж болно. Мөн "Гэртээ хүрэх зам", "Өндөрт өлгөсөн улаан дэнлүү" зэрэг Жан Имоу-н кинонууд, Ван Куананы "Туяагийн гэрлэлт" болон Оскарын шагналыг хэд хэдэн төрлөөр хүртсэн найруулагч Ань Ли-н "Бөгтөр уул", "Дайрагч бар, нуугдсан луу" кинонуудын нэрийг дурдахад л хангалттай бизээ. Хятадын киночид Дэлхийн кино наадмуудын нэр төртэй оролцогчид болж чадсаныг Каннын кино наадмын үйл явц түвэггүй харуулсаар байна. Харин хэн нь Дал модны алтан мөчиртэй ирэхийг одоогоор таашгүй...