Бээжин хотод ирэнгүүтээ би номын дэлгүүрт очсон юм. Мундаг байгаа биз? Гэхдээ сайндаа биш л дээ, Бээжин хотын газрын зураг худалдан авах гэж тэр. Улаанбаатарын дэлгүүрээс аялагчийн авсаархан зураг олж авч амжаагүй юм.

      Шинэ газар тодорхой хугацаагаар явах болвол би хамгийн түрүүн газрын зураг худалдан авдаг. Үүнийг надад нэг найз маань сургасан. Тэр Америкт шуудан зөөгч хийдэг байлаа. Тэгээд машиндаа байнга газрын зурагтай явна. Тэр газрын зураг ажилд нь болоод амьдралд нь үргэлж тус болж харагдана. Найз маань хотынхоо дурсгалт газрууд, хамгийн сайхан цэцэрлэгүүд гээд бүгдийг мэднэ. Хэнээс ч зам асуухгүй, газрын зургаа л ухаад олчихно. Тэгээд аажимдаа би ч газрын зурагны тусыг ойлгодог болж шинэ хотод ирэнгүүтээ сайн хаягласан, тайлбартай газрын зураг л хамгийн түрүүнд худалдан авдаг болсон.