2. "Дорнын сувд" телевизийн цамхаг. 468 м өндөр энэ цамхаг өндрөөрөө Азидаа 1-рт, дэлхийд 3-т ордог. Цамхагийн дээрээс Шанхай хотын сүүлийн зуун жилийн хөгжлийг алган дээр тавьсан мэт харж болно гэдэг. 50 хүний багтаамжтай цахилгаан шат нь нэг секундэд 7 м-н өндрийг туулах чадалтай.

      3. Шанхайн музей. Хятаддаа томоохон музейнүүдийн тоонд ордог энэ музей 11 галерей, 3 үзэсгэлэнгийн танхимтай, 4 давхар барилгатай. Хотынхоо яг төвд Ардын талбайн зүүн талд байрладаг. Мөн Их театр, Шанхайн хөгжлийн үзэсгэлэнгийн танхим хаяа залган байрладаг.

      4. Юу Юан цэцэрлэг. Хятадын Мин гүрний үеийн ихэс дээдсийн суудаг ордны хэв загвар, цэцэрлэгийн үзэмжийг харж болно. Гэхдээ алтан өнгөтэй загас жараахайнууд чуулсан хиймэл нуурууд, арзгар чулуун гүүр, баримлуудаараа эх газрынхаа ижил төстэй орднуудаас эрс ялгарах юм.

      5. Хотын сахиусны сүм. Юу Юан цэцэрлэгтэй зэрэгцэн оршдог. Юан гүрний төгсгөл, Мин гүрний эхэн үед ордны чухал албанд зүтгэж явсан Чин Юубо-н аварга шуумал бүхий мөргөлийн ордон юм. Юан гүрний мөхлийн үеийн ордны зөрчилдөөнөөс дайжсан Чин Юубо Шанхайд зугтан ирж орогнож байжээ. Тэнгэрийн сүмийн эргэн тойрны эртний Шанхайн дүр төрхийг хадгалж үлдсэн худалдааны, цайны гудамжууд нь жуулчдын анхаарлыг их татах юм. Амарч тухлах уламжлалт цайны гэрүүдээс гадна, хүний хар нүднээс бусдыг дэлгэсэн гэмээр худалдааны лангуунууд эрээлжилнэ.