Гурван өдрийн дотор Хятадын 3 хотод зочилсон, Засгийн газрын гурван сайд айлчлалд дагалдан ирсэн, Siemens, BMW, Mercedes-Benz мэтийн олон нэрт компанийн эзэд айлчлалд хамрагдсан, Хятадын олон компанид зочилж, инновацийн хамтын ажиллагаанд анхаарлаа хандуулсан... Сүүлийн өдрүүдэд Германы канцлер Олаф Шольцын Хятадад хийсэн айлчлал барууны олон нийтийн анхаарлыг өргөн хүрээнд татаж байна.
Өчигдөр, 16-нд Олаф Шольцын Хятадад хийсэн айлчлалын сүүлийн өдөр Хятад улсын дарга Ши Жиньпин Бээжинд түүнтэй уулзав. Хоёр орны удирдагч Хятад, Германы харилцааны байр суурь, олон улсын болон бүс нутгийн халуун цэгийн асуудлаар санал бодлоо гүнзгий солилцов.
Хятад, Германы хооронд үндсэн ашиг сонирхлын зөрчил байхгүй, бие биедээ аюул занал учруулахгүй, Хятад Герман харилцан ашигтай хамтарч ажиллах нь "эрсдэл" биш, харин хоёр орны харилцааны тогтвортой байдлын баталгаа, ирээдүйг нээх боломж юм гэж Хятадын тал илэрхийлэв.
Хятад улстай хоёр талын харилцааг үргэлжлүүлэн бэхжүүлж, хоёр талын яриа хэлэлцээ, олон салбарын хамтын ажиллагааг гүнзгийрүүлэн, боловсрол, соёл болон иргэдийн солилцоог ахиулахад Германы тал бэлэн байгаагаа илэрхийлэв. Мөн хоёр тал чөлөөт худалдаа, эдийн засгийн даяаршлыг дэмжиж, дэлхийн сорилтод хамтран хариу арга хэмжээ авч, дэлхийн энх тайван, тогтвортой байдлыг хамгаалахад бэлэн байгаагаа илэрхийлжээ.
Энэ жил Хятад Герман хоёр тал бүх талын стратегийн түншлэлийн харилцаа тогтоосны 10 жилийн ой болно. Удаан хугацаанд Хятад, Германы харилцаа Хятад улс барууны гүрнүүдтэй харилцах харилцааны тэргүүн эгнээнд явж ирсэн. Хоёр талын удирдагчид ойр дотно харилцаатай байна. Хоёр улсын Засгийн газар хоорондын зөвшилцөл, стратеги, санхүүгийн болон бусад салбарт өндөр түвшний яриа хэлэлцээ хийх зэрэг механизмууд үр дүнтэй ажиллаж байна. Энэ нь Хятад, Германы хамтын ажиллагааг тасралтгүй баталгаажуулж, Хятад Европын харилцааны тогтвортой хөгжлийг ахиулж байна.
Сүүлийн жилүүдэд дэлхийн геополитикийн байдал гүнзгий өөрчлөгдөж, Хятад, Германы харилцааны хөгжил мөн сорилттой тулгарч байна. Олаф Шольцыг Хятадад айлчлахад улс төрийн шуугиан их гарсан. Европын холбоо "эрсдэлийг арилгах" нэрийн дор Хятадын цахилгаан машин болон бусад бүтээгдэхүүнд нөхөн олговрын эсрэг мөрдөн шалгалт явуулж байна. Европын зарим хүн Германыг "Хятадын эдийн засагт түших байдлаа бууруулах ёстой" гэж шүүмжилж байна.
Харин үр дүн ямар байсан бэ? Канцлер Олаф Шольц Хятадад хийсэн айлчлал, Германы бизнесийн салбарынхан Хятадын зах зээлийг тэлэн өргөжүүлэх хүсэлтэй байгаа нь Германы Засгийн газрын Хятад улсын талаарх ерөнхий бодлого оновчтой, ажил хэрэгч хэвээр байгааг харуулж байна. Германы зарим олон нийтийн үзэж буйгаар Герман улс өөрийн эдийн засаг удааширсан сорилтыг даван туулах, мөн Украины хямралыг шийдвэрлэхэд Хятадтай хамтын ажиллагаагаа бэхжүүлэхийг эрэлхийлэх ёстой гэв.
Дэлхийн хоёр, гурав дахь эдийн засагтай Хятад, Германы аж үйлдвэр, ханган нийлүүлэлтийн сүлжээ нь хоорондоо нягт уялдаатай, хоёр орон зах зээлээ дээд хэмжээгээр харилцан нөхвөрлөж байна. Хоёр орны эдийн засгийн хамтын ажиллагаа нь маш уян хатан. Хятадын зах зээлд одоо Германы 5000 гаруй компани ажиллаж байна. Германы Төв банкны статистик мэдээгээр, Германы Хятадад оруулсан шууд хөрөнгө оруулалт өнгөрсөн оны мөн үеэс 4.3 хувиар буюу 11.9 тэрбум евро болж нэмэгдсэн нь түүхэн дээд амжилт болж байна. Германы Холбооны Статистикийн газрын тоо баримтаас үзвэл, 2023 онд Герман Хятадын хоёр талын худалдааны хэмжээ 253 тэрбум 100 сая евро байв. Ингэснээр Хятад улс найман жил дараалан Германы хамгийн том худалдааны түнш болж байгаа юм.
Хятад Германы удирдагчдын уулзалтаар хоёр тал ивээх үзлийг эсэргүүцэж, бодит хамтын ажиллагаа бэхжүүлэхийг хүсэж байгаагаа илэрхийлэв. Машин механизм, автомашины уламжлалт салбар төдийгүй ногоон өөрчлөлт, дижиталчлал, хиймэл оюун ухаан зэрэг шинээр гарч буй олон салбарт хоёр улс харилцан ашигтай хамтрах асар их нөөц боломжтой, үүнийг цаашид нээн хөгжүүлэх шаардлагатай гэж Хятад улс санал болгов. Энэ нь Хятад Германы эдийн засгийн хамтын ажиллагааг өргөжүүлэх чиглэлийг тодруулж байгаа юм.
Олаф Шольц Чунчин, Шанхай хотод айлчлахдаа Германы хөрөнгө оруулалттай устөрөгчийн эрчим хүчний компани, Германы аж ахуйн байгууллагын инновацийн төвүүдээр зочилсон гаднынхны анхаарлыг татжээ. Энэ нь хөгжиж буй салбар дахь Хятад, Германы хамтын ажиллагааг гүнзгийрүүлэхэд Герман улс нааштай байр суурьтай байгааг харуулж байна. Түүнчлэн автомат жолоодлогын технологийн салбарт хамтран ажиллах олон баримт бичигт гарын үсэг зурсан нь хоёр тал хамтран ажиллах хүсэл эрмэлзлээ илүү бодит үр дүнд хүргэж байгааг харуулж байна.
